فەرماندەیەکی پێشمەرگە ئەوە ئاشکرا دەکات کە کاتێک 100 کەس دەیانەوێت بچنە شوێنێک، ناتوانن دزە بکەن و بە دووری نازانێت، لایەنێک، ئەو هێزەی داعشی بۆ ناو کەرکووک بردبێت.



حوسێن یەزدانپەنا، فەرماندەی هێزی پێشمەرگەی ڕۆژهەڵات لە ڕۆژئاوای کەرکووک، بە ماڵپەڕی فەرمیی پارتی ڕاگەیاند، ئەو تیرۆریستانەی داعش كە هێندرابوونە شاری كەركووک و ئەم هێرش و كردەوە تیرۆریستییانەیان كرد، لە چەند ڕۆژی ڕابردوودا، پیلانێك بوو دژی كورد و هێزی پێشمەرگە و شاری كەركووک، ڕەنگە ئێستا زوو بێت بۆ ئەوەی ناوی ئەو لایەنە ببرێت كە چاوساغیان بوونە“. جەختیشی لەوە کردەوە: ”بەهیچ شێوەیەك مومكین نییە 100 كەس بە یەكەوە بتوانن دزە بكەنە نێو شاری كەركووکەوە، بگرە بە چوار كەڕەتیش ناتوانن دزە بكەن. خۆ ئەوان چەكداری تەواو بوون و ناكرێ بەو چەك و تفاقەیانەوە و بەو ڕیش و پەشمەی داعشەوە بە ناوی ئاوارەوە هاتبن بۆ ناو شاری كەركووک. بۆیە ئەمە دزەكردن نەبووە، بەڵكو هێنانی هێزێكی گەورەی چەكدارە بە سوود وەرگرتن لە توانا و دەرفەت كە دەبێ ئەو لایەنە هەیبووبێت لەو ناوچەیە و ئەوانی هێنابێت".



ئەوەشی ڕوون کردووەتەوە کە بەشێك لە مەبەستەكانی دیکەی هێرشەکەی داعش بۆ سەر كەركووک، پەكخستنی ئەو هێرشانەی هێزی پێشمەرگەیە كە زۆر بە قارەمانانە كردوویەتیە سەر شاری مووسڵ و ڕۆژ بە ڕۆژ تیرۆریستان لەناو دەبات و لە سەنتەری مووسڵ نزیك دەبێتەوە.



باسنیوز