زیاتر لە نیوەی ئەو مزگەوتانەی لە باشووری کوردستان گوتاری هەینیان تێدا دەخوێندرێت گوتارخوێنەکانیان ناونیشانی گوتارخوێنیان نییە، وەزارەتی ئەوقافیش دەیەوێت بەرێژەی 50% گوتارەکان لە مزگەوتەکان کەمبکاتەوە.

وەک بەرپرسانی وەزارەتی ئەقاف دەڵێن: بەهۆی زۆری ژمارەی مزگەوتەکان، ناتوانین گوتارەکانی رۆژی هەینی بەتەواوی کۆنترۆڵ بکەین، بۆیە بەنیازن بەڕێژەی 50% گوتاری هەینی لە مزگەوتەکان کەمبکەنەوە.

لە هەرێمی کوردستان هەفتانە لە سێ هەزار مزگەوت گوتاری هەینی دەخوێندرێن، کەچی تەنیا 1350 مامۆستای ئەو مزگەوتانە ناونیشانی ئیمام و خەتیبیان هەیە، زیاتر لە 100 مامۆستای دیکەش گوتاری هەینی دەخوێنن و سەر بە وەزارتی ئەوقاف نین.

لە هەرێمی کوردستان زیاتر لە 5 هەزار مزگەوت هەن، تەنها لە 6 مانگی سەرەتای ئەمساڵیش 60 مزگەوت دروستکراون و 50 مزگەوتی دیکەشیان لە قۆناخی دروستکردندان. بەپێی ئامارەکانی وەزارەتی ئەوقاف: رۆژانی هەینی زیاتر لە نیو ملیۆن کەس لە هەرێمی کوردستان ئامادەی نوێژی هەینی دەبن.






رووداو