ئاڵا تاڵەبانی: لەگەڵ فراكسیۆنی گۆڕان یەكمانگرتەوە
دوای كۆبوونەوەكە سەرۆكی فراكسیۆنەكانی یەكێتی و گۆڕان لە ئەنجوومەنی نوێنەرانی عێراق لە كۆنگرەیەكی رۆژنامەوانیدا ناوەڕۆكی كۆبوونەوەكەیان بۆ دەزگاكانی راگەیاندن ئاشكرا كرد.
سەرۆكی فراكسیۆنی گۆڕان هۆشیار عەبدوڵا لە كۆنگرەكەدا رایگەیاند "كۆبوونەوەكە بۆ قسەكردن بوو لەسەر چۆنێتی هەنگاونان و بەرنامەی كار و ئەو ئامانجانەی كە ئیئتیلافی هاوبەشی نێوان فراكسیۆنی گۆڕان و یەكێتی لە پەرلەمانی عێراق رێك دەخات، هەموو ئەو هێڵە سەرەكی و هەنگاوە ستراتیجییانە و چۆنێتی ئالیەتی كاركردنی پێكەوەییمان لە ئاستی سیاسی و پەرلەمانی لە ئەنجوومەنی نوێنەران دانا و بۆ هەموو ئەو ئەرك و هەنگاوە چاوەڕوانكراوانەی لەم ئیئتیلافە چاوەڕوان دەكرێت كۆمەڵێك لیژنەمان دانا".
گوتیشی "چاوەڕوان دەكەین ئیئتیلافەكە هەنگاوێك بێت بە ئاراستەی پتەوتركردنی یەكدەنگی كورد لەگەڵ فراكسیۆنەكانی تر و لە بەرژەوەندی خەڵكی كوردستان".
هۆشیار عەبدوڵا ئەوەشی گوت "لای هەردوولا یەكڕیزی ستراتیج و قەناعەتێكی قوڵە، بەڵام قۆرخكردنی بڕیاری سیاسی لەلای هەردوولامان لەلایەن هەر لایەنێكی سیاسییەوە رەتكراوەیە".
سەرۆكی فراكسیۆنی گۆڕان لە پەرلەمانی عێراق ئاماژەی كرد بەوەی، نایانەوێت ئیئتیلافەكەیان لە هیچ لایەنێكی تر دووریان بخاتەوە و هیوایان وایە سەرەتایەك بێت بۆ یەكخستنی زیاتری لایەنە كوردییەكان.
لەلای خۆیەوە سەرۆكی فراكسیۆنی یەكێتی لە پەرلەمانی عێراق ئاڵا تاڵەبانی لە كۆنگرەكەدا گوتی "ئەوە یەكەم كۆبوونەوەی هاوبەشی نێوان هەردوو فراكسیۆنە و لەگەڵ سەركردایەتی هاوبەش كۆبووینەوە و پێشتریش قسەمان لەسەر چۆنێتی رێككەوتن و یەكگرتنمان كردووە لە پەرلەمانی عێراق، ئەمڕۆ قسەمان كرد لەسەر وردەكارییەكانی ئەم یەكگرتنەوە و فراكسیۆنەكە و كۆبوونەوەكانی دووسبەی پەرلەمانی عێراق و بەشداریمان لە كۆبوونەوەكانی پەرلەمان وەك فراكسیۆنێكی هاوبەش".
ئاڵا تاڵەبانی گوتیشی "هەردوولا دەبین بەیەك فراكسیۆن و پێكهێنانی لیژنەكەش بۆ قسەكردنە لەسەر میكانیزم و شێواز و ئیدارەی فراكسیۆنە هاوبەشەكە و لە رۆژانی داهاتوودا قسە لەسەر ناو و سەرۆكی فراكسیۆنەكە دەكەین".
باسنيوز
