سەرۆكایەتیی هەرێمی كوردستان ئیدانەی تەقینەوەکەی شاری حەسەكە لە رۆژئاوای کوردستان دەكات.

لە راگەیێندراوێکی سەرۆکایەتی هەرێمی کوردستاندا هاتووە "ئێوارەی رۆژی سێشەممە 5ـی 7ـی 2016 لە ئەنجامی كردەوەیەكی خۆكوژی و ترسنۆكانەی تیرۆریستان لە شاری حەسەكەی رۆژئاوای كوردستان 16 هاووڵاتی شەهید و دەیان كەسی دیكەیش بریندار بوون".

لە بەشێکی دیکەی راگەیێندراوەکە زۆر بەتوندی ئیدانەی تەقینەوەکە دەکات و رایدەگەیێنێت " وێڕای ئەوەی زۆر بە توندی ئیدانەی ئەم كردەوە نامرۆڤانەی تیرۆریستان دەكەین سەرەخۆشی لە كەسوكاری شەهیدانی ئەو رووداوە دەكەین و هیوای چاكبوونەوە بۆ برینداران دەخوازین".

سەبارەت بە بریندارانی تەقینەوکە ئاماژە بەوەشدراوە کە " بە خوشك و برایانمان لە رۆژئاوای كوردستان و شاری حەسەكە رادەگەیێنین كە دامەزراوە تەندروستییەكان و دەزگە پەیوەندیدارەكانی هەرێمی كوردستان بە هەموو توانایەك ئامادەی پێشوازیكردن لە برینداران و یارمەتیدانی لێقەوماوانی ئەو كردەوە تیرۆریستییەن".

ئێوارەی رۆژی سێشەممە 5-7-2016 لەبەردەم نانەواخانەیەكی گەڕەكی ساڵحیەی شاری حەسەكە تەقینەوەیەك روویدا.

بەپێی زانیارییەكان تەقینەوەكە لە ئەنجامی هێرشێكی خۆكوژی روویداوە و بەو هۆیەوە 16 هاونیشتمانی شەهیدبوون، كە 2 ژن و منداڵێك لەنێو كوژراوەكاندان، بە دەیان برینداریش هەن.