(فازڵ میرانی) ڕایگەیاند، دەسەڵاتدارانی عێراق نەیانتوانی نموونەیەكی جوانی (دیموكراتی و فیدراڵی) جێبەجێ بكەن و، پێویستە ئێستا رێز لە ئیرادەی گەلی كوردستانبگیرێ، لە مافی چارەی خۆنووسین كە مافێكی رەوایە.

ئەمڕۆ لە بارەگای مەكتەبی سیاسیی پارتی دیموكراتی كوردستان، (فازڵ میرانی) سكرتێری مەكتەبی سیاسی، پێشوازی لە نووسەر و كەسایەتیی سیاسی (حەسەن عەلەوی) دۆستی دێرینی گەلی كورد و پاڵپشتی دۆزی رەوای گەلی كورد، كرد.

وێڕای بەخێرهێنانی میوان، (فازڵ میرانی) خۆشحاڵی خۆی بۆ ئەم دیدارە دەربڕی و، لە دیدارەكەدا گفتوگۆ و بیروڕا ئاڵوگۆڕ كرا سەبارەت بە بارودۆخی سیاسی و ئەمنیی هەرێمی كوردستان و عێراق و ناوچەكە و، نیگەرانیی خۆیان نیشان دا بۆ قووڵبوونەوەی كێشە سیاسییەكانی عێراق كە گرینگە بە دیالۆگ و لێكتێگەیشتن كێشەكان چارە بكرێن.

سكرتێری مەكتەبی سیاسی تەئكیدی كردەوە كە، لە رابردوودا كورد رووبەرووی كوشتن و ماڵوێرانی و دەربەدەری و كیمیاباران و ئەنفالكردن و بێسەروشوێنكردنی (8) هەزار بارزانی بووەتەوە، بەڵام كورد گەلێكی ڕقهەڵگر نییە و هەردەم بە لێبووردەیی وەڵامی داوەتەوە و بەردەوام هەوڵی داوە بۆ بونیادنانی عێراقێكی دیموكراتی و فیدراڵی و مسۆگەركردنی مافەكانی گەلی كورد، بەڵام دەسەڵاتدارانی عێراق نەیانتوانی نموونەیەكی جوانی (دیموكراتی و فیدراڵی) جێبەجی بكەن و پێویستە ئێستا رێز لە ئیرادەی گەلی كورد بگیرێ، لە مافی چارەی خۆنووسین كە مافێكی رەوایە و بە ژیرانە ددان بە هەڵەكانی ڕابردوودا بنێن و بەگفتوگۆ و بە شێوەیەكی ئاشتییانە و لێكتێگەیشتن ئەم پەیوەندییەیان رێك بخرێت.

لەلای خۆیەوە، (حەسەن عەلەوی) سوپاسی سكرتێری مەكتەبی سیاسی كرد بۆ ئەم پێشوازییە و دووپاتی كردەوە كە، گەلی كورد گەلێكی قارەمانە و لە پێناو ئازادی و سەربەستیدا ئازارێكی زۆری چەشتووە و قوربانییەكی زۆری داوە، ئێمە لەگەڵ هەر بڕیارێكین كە گەلی كورد بیدات بۆ مافی چارەی خۆنووسین و ئەمن یەكەم دەبم كە پێرۆزباییتان لێ دەكەم و پشتیوانی دەكەم و، هیوای خواست ناوماڵی كورد بە زووترین كات رێك بخرێت و خۆ ئامادە بكات بۆ هەر ئەگەرێك.

لە كۆتاییدا (فازڵ میرانی) ستاییشی هەڵوێستەكانی ڕووناكبیر و نووسەر (حەسەن عەلەوی) كرد بۆ پشتیوانی بەردەوامیان لە گەلی كورد و دۆزەكەی.











KDP