سەرۆكی لیژنەی كاروباری دەرەوە لە ئەنجوومەنی پیرانی ئیتاڵیا، سەركەوتنە بەردەوامەكانی پێشمەرگەی بەرانبەر تیرۆر بەرز نرخاند و، هه‌روه‌ها ڕایگه‌یاند، پێشمه‌رگه‌ جێگەی شانازیی كۆمەڵگەی نێودەوڵەتییه‌.

ئێوارەی ئەمڕۆ یەكشەممە 26-6-2016 نێچیرڤان بارزانی سەرۆكوەزیرانی هەرێمی كوردستان، پێشوازی لە پیێر فردیناندۆ كاسینی، سەرۆكی لیژنەی كاروباری دەرەوە لە ئەنجوومەنی پیرانی ئیتاڵیا و شاندێكی دیپلۆماسی و سەربازیی یاوەری كرد.


لە دیدارێكدا، كاسینی خۆشحاڵیی خۆی بە سەردانی هەرێمی كوردستان دەربڕی و باسی لە سەردانەكەی بۆ بنكەی مەشق و ڕاهێنانی هێزەكانی پێشمەرگەی كوردستان كرد كە لەلایەن پسپۆڕانی سەربازیی ئیتاڵیاوە مەشق و ڕاهێنانیان پێدەكرێت. سەركەوتنە بەردەوامەكانی پێشمەرگەیشی بەرامبەر تیرۆر بەرز نرخاند كە توانیویانە بەو قارەمانێتیە پێگەیەكی گرنگ بۆ هەرێمی كوردستان لە هەموو جیهان دروست بكەن و ببنە جێگەی شانازیی كۆمەڵگەی نێودەوڵەتی.

لە بەشێكی دیكەی قسەكانیدا باسی لە پەیوەندییە تۆكمەكانی نێوان هەرێمی كوردستان و ئیتاڵیای كرد و هیوای خواست لە هەموو بوارەكاندا پەرە بەو پەیوەندییانە بدرێت و لەمبارەیەشەوە هەموو هاوكاری و هەماهەنگییەكی لیژنەی كاروباری دەرەوەی ئەنجومەنی پیرانی ئیتاڵیای دەربڕی، هەروەها داوای لە بەڕێز سەرۆك وەزیرانی هەرێمی كوردستان كرد سەردانی ئیتاڵیا بكات و ڕاستەوخۆ بارودۆخ و خواستەكانی خەڵكی كوردستان بە ڕای گشتیی ئیتاڵیا بگەیەنن و هاوكاریی زیاتر بۆ هەرێمی كوردستان دابین بكەن.

لای خۆیەوە سەرۆكوەزیرانی هەرێمی كوردستان سوپاسی ئەو سەردانە و تێبینییەكانی شاندی میوانى كرد، هەروه‌ها سوپاسی خەڵك و حكوومەتی هەرێمی كوردستانی بەرامبەر هاوكارییە بەردەوامەكانی ئیتاڵیا بۆ هەرێمی كوردستان دەربڕی و دەشتخۆشی لە پسپۆڕانی سەربازیی ئیتاڵیا كرد كە لە هەرێمی كوردستان مەشق و ڕاهێنان بە هێزی پێشمەرگە دەكەن.

سەبارەت بە پەیوەندییەكانی نێوان هەولێر و ڕۆما، نێچیرڤان بارزانی جیا لە بەرزنرخاندنی پەیوەندییەكان، ئامادەییی حكوومەتی هەرێمی كوردستانیشی بۆ زیاتر پەرەپێدانی پەیوەندییەكان دەربڕی و سوپاسی بەڕێزیشیانی كرد كە لە ڕابردوو و ئێستادا بە باشترین شێوە پاڵپشتی لە هەرێمی كوردستان كردووە.

تاوتوێكردنی پەیوەندییەكانی نێوان هەولێر و بەغدا و پێگیریی هەرێمی كوردستان بۆ چارەسەركردنی كێشەكانی لەگەڵ بەغدا بە ڕێگەی دیالۆگ و گفتوگۆ و پرۆسەی ئازادكردنی مووسڵ و ناوچەكانی دیكە لە دەست تیرۆرستانی داعش بە هەماهەنگیی نێوان هەولێر و بەغدا و وڵاتانی هاوپەیمان و چەند بابەتێكی دیكەی پەیوەندیدار، لایەنێكی دیكەی دیدارەكە بوون.