کورد و سوننەکان لە ترسی شیعەکان خورماتوو چۆڵ دەکەن
رۆژی یەکشەممە 26ـی حوزەیرانی 2016، محەمەد فایەق، بەڕێوەبەری راگەیاندنی قایمقامیەتی خورماتوو چەند وێنەیەکی کۆچی کورد، تورکمان و عەرەبە سوننەکانی لە لاپەڕەی تایبەتیی خۆی لە تۆڕی کۆمەڵایەتیی فەیسبووک بڵاو کردووەتەوە.
محەمەد فایەق هەروەها رایگەیاندووە، کە دەزگا ئەمنییەکانی شارەکە سێ کەسیان بە تۆمەتی هەڕەشەکردن لە هاووڵاتییانی کورد، عەرەب و تورکمانی سوننەمەزهەب بۆ بەجێ هێشتنی شارەکە، دەستگیر کردووە.
خورماتوو شارۆچکەیەکی کوردستانییە و دەکەوێتە سنووری پارێزگای سەڵاحەدین، تێیدا وێڕای کورد، تورکمان و عەرەبی شیعە و سوننەی تێدا نیشتەجێن، بەڵام بەهۆی رێککەوتنی سەرکردەکانی یەکێتیی نیشتیمانیی کوردستان و بەرپرسانی میلیشیاکانی حەشدی شەعبی، هێزی پێشمەرگە لە شارەکە کشاوەتە دەرەوە و میلیشیاکانیش ستەم لە نەتەوە و مەزهەبەکانی دیکە دەکەن و خانووەکانیان دەڕووخێنن.
باسنيوز
