چەند زانیارییەکی تازەی کۆبوونەوەکەی نێوان سەرۆکی هەرێمی کوردستان و شاندێکی ئەمریکی و عێراقی ئاشکرا بوو کە تێیدا نوێنەری باراک ئۆباما لە هاوپەیمانیی نێودەوڵەتی لە دژی داعش، هەڵوێستی خۆیان سەبارەت بە بارزانی ڕادەگەیەنێت.

یەکشەممەی ڕابردوو 19\6\2016، مەسعود بارزانی، سەرۆکی هەرێمی کوردستان، پێشوازی لە برێت ماکگۆرک، نوێنەری سەرۆکی ئەمریکا لە هاوپەیمانیی نێودەوڵەتی و فالح فەیاز، ڕاوێژکاری ئاسایشی نەتەوەیی عێراق و شاندی یاوەریان کرد.

بە گوێرەی ئەو زانیارییانە، لە کۆبوونەوەکەدا، ماکگۆرک بە ڕاشکاوانە لە بەردەم بارزانی و شاندە عێراقییەکەدا گوتوویەتی: ”دەبێت هەموو لایەنەکان ئەو ڕاستییە بزانن کە بارزانی یەکێکە لە گەورەترین فەرماندەکانی ئۆپەراسیۆنی شەڕی داعش کە سەبارەت بە ئێمەوە، بابەتێکی هەستیار و چارەنووسسازە“. جەختیشی لەوە کردووەتەوە: ”ئارامیی بارزانی و بۆچوونەکەی بۆ ئێمە زۆر گرنگە، چونکە بەشێکی گرنگە لە ئۆپەراسیۆنەکان“.

پێشتر لە ڕاگەیاندراوێکدا سەرۆکایەتیی هەرێمی کوردستان ئاماژەی بەوە کردبوو کە لەو کۆبوونەوەیەدا، بارزانی ڕای گەیاندووە: ”ئەولەویەتی سەرەكیی هەرێمی كوردستان شەڕی داعشە“. هەورەها هەماهەنگیی نێوان هەرێمی كوردستان و عێراق و ئەمەریكای بە پێویست زانی بۆ یەكلاییكردنەوەی گرفتەكان و تێكشكاندنی تیرۆریستان و ئەوەیشی خستەڕوو كە لە كاری هاوبەشدا پێویستە لە نیگەرانییەكانی یەكتر بگەین و گرتنەبەری نەهجی هەڵەش بۆ مامەڵە لەگەڵ پێشهاتەكان دەبێتە هۆی قووڵتربوونی گرفتەكان.











باسنیوز