سیاسەتمەدارێكی كورد، لە پەراوێزی قسەكانی جێگری سەرۆكی ئەمەریكادا كە باسی دابەشبوونی عێراقی كردووە، دەڵێت: "ئەمەریكا گەییشتووەتە ئەو بڕوایەی عێراق كەڵكی یەكپارچەیی نەماوە و دەبێت دابەش ببێت، بۆیە گرینگە كورد لەگەڵ ئەو قەناعەتەی ئەمەریكا و رێكخستنەوەی ناوماڵی خۆی، ئامادەیی هەبێت بۆ جیابوونەوە لە عێراق".

پێوه‌ست به‌م پرسه‌ش (د. شەفیق قەزاز)، سیاسەتمەدار و شارەزا لە كاروباری ئەمەریكا، بە ماڵپەری فەرمیی پارتیی دیموكراتی كوردستانی راگەیاند: "لەگەڵ (جۆز بایدن) جێگری سەرۆكی ئەمەریكا خەڵكانێكی دیكەیش دەمێكە باسی ئەوەیان كردووە كە دەبێت عێراق ببێتە سێ پارچە و، پێشبینیش كراوە كە عێراق ئاستەمە وەك یەك پارچە بمێنێتەوە، چونكە عێراق دەوڵەتێكی شكستخواردووە، بەو پێییەی ئەو توخمانەی تێیدان بە شیعە و سوننە و كوردەوە دەبێت خەمی خۆیان بخۆن، چونكە تۆ ناتوانیت چاوەڕوانی ئەوە بكەیت تا عێراق دادەڕزێت و شەڕی ناوخۆ دروست ببێت، چونكە ئەو كاتە تۆ ناتوانیت فریای خۆت بكەویت، بەڵام سەبارەت بە ئێمەی كورد لە چوارچێوەی عێراقدا، پێشبیینی دەكەم دۆخەكە بۆ كورد لەبارە".

(قەزاز) گوتیشی: "ئێمە دەبێت خۆمان لە سیاسەتی عێراق دوور بخەینەوە و خەریكی ناوماڵی خۆمان بین، ئێمە ئەگەر خەمی خۆمان نەخۆین، ئەمانە هیچ سوودێكیان نییە، چونكە نە ئەمەریكا و نە لایەنەكانی دیكە فریامان ناكەون، بۆیە دەبێت كورد بێتە پێكهاتەیەكی حوكمڕانی و قەوارەیەكی گەورەتر بەڕێوە بەرێت، تۆ ناكرێت ببیت بە ئەرك بەسەر كۆمەڵگای نێودەوڵەتییەوە، بۆیە پێشبینی ناكەم ئێمە لەو دۆخەدا بین كە بەربژێر بین بۆ ئەگەرێكی لەو شێوەیە، چونكە ئەگەر سبەی عێراق لێك هەڵوەشا و تەواو بوو، تۆ ئەگەر لەناو خۆتا ئامادە نەبیت وەك پێكهاتەیەك لە ڕووی ئابووری و سیاسی و دیپلۆماسی و كۆمەڵایەتی و ئەمنییەوە، ئەوە هەزار دەرفەت بێَتە پێشەوە بە راستی لە دەستی دەدەین".

(د. شەفیق قەزاز) دەشڵێت: "ئەوەی (بایدن) دەیڵێت شتێكی زۆر سەیر نییە، كاتێك ئەو قسەیەی دەكرد ئەو كات سیناتۆرێك بوو، بەڵام ئێستا لە مەركەزی دەسەڵاتدایە، ئەم پیاوە یەك پلە نزمترە لە سەرۆكی ئەمەریكا، مانای ئەوەیە كە خەریكە ئەوانیش قەناعەت دەهێنن كە ئەوەی لە عێراقدا دەیكەن بۆ ئەوەی ببێتە دەوڵەتێكی خاوەن پێناسەی یەكگرتوو، دەوڵەتێكی بەكارهاتوو، دەوڵەتێكی پێشكەوتوو سەر ناگرێت، بەڵام مانای ئەوەیش نییە ئەمەریكا دەست لە عێراق بشوات، چونكە ئەمەریكا تا كۆتایی كاتەكە لەگەڵی دەڕوات، لەبەر ئەوەی بەردەوام پێمان دەڵێن بەرانبەر بە بەغدا نەرمی بنوێنن و لەگەڵ عێراقدا بن، بەڵام قسەكانی (بایدن) نیشانەی ئەوەیە كە عێراق كەڵكی ئەوەی نەماوە و ناشتوانی پینە و پەڕۆی بكەیت، چونكە دەوڵەت كۆمەڵێك پێوەری هەیە، كە ئەوانەی لە دەست دا، شكستخواردووە و لێك دەترازێت، بۆیە ئێستا عێراق وایە".

ئه‌و شارەزایه‌ی كاروباری ئەمەریكا ده‌شڵێت: "دەبێت كورد بەربژێری یەكێك لەو شتانە بێت كە سبەی عێراق لێك ترازا ئێمە ئامادەییمان هەبێت بۆ جیابوونەوە یان قەوارەیەكی سەربەخۆ، چونكە ئێستا عێراق لە بەردەم دوو ئەگەردایە، یەكەم: دەبێت هەڵوەشێتەوە و پێكهاتەكانی بڕیار لەبارەی خۆیانەوە بدەن. دووەم: لەوە دەچێت پینە و پەڕۆ بكرێت تا چەند ساڵێكی دیكە كە ئەمە سەر ناگرێت، چونكە گرفتی ئایینی و ئەمنی و سیاسی هەیە، بۆیە ئەگەری زۆری هەیە عێراق نەمێنێت، بۆیەیش دەبێت كوردستان بۆ ئەم ئەگەرە ئامادە بێت".

جێگای ئاماژه‌یه‌ له‌به‌شێكی دیداره‌كه‌یدا لەگەڵ كەناڵی (Charlie Rose)ـی ئەمەریكا، (جۆ بایدن) جێگری سەرۆكی ئەمەریكا، پشتگیری لە بیرۆكەی دامەزراندنی سێ هەرێمی كۆنفیدراڵی لە عێراق دەكات، كە پێشتر لە لایەن (مەسروور بارزانی)، ڕاوێژكاری ئەنجوومەنی ئاساییشی هەرێمی كوردستان پێشنیاز كرابوو. (بایدن) پێی وایە دەكرێ هەر سێ لایەنی كورد، سوننە و شیعە لە عێراق، هەرێمی كۆنفیدڕاڵیی خۆیان هەبێت و هەركامەیان ناوچەكانی خۆیان بەڕێوە ببەن.











KDP