سەرۆکی هەرێمی کوردستان پەیامیک بەبۆنەی کۆچی دوایی پرۆفیسۆر مستەفا زەڵمی بڵاودەکاتەوە و بە رایدەگەیێنێت: " هەواڵی کۆچی دوایی دکتۆر مستەفا زەڵمی خەمباری کردم".

مەسعود بارزانی، سەرۆکی هەرێمی کوردستان پرۆفیسۆر مستەفا زەڵمی بە کەسایەتییەکی زانا و بیرمەندێکی بە ئەزموون و بەتوانا ناوزەد دەکات و رایدەگەیێنێت: "دکتۆر مستەفا زەڵمی کەسایەتییەکی گەورە و بەناوبانگی جیهانی ئیسلامی بوو و وەک عەللامە و بیرمەندێکی گەورە پێگەیەکی گرینگی لە ناوەندە زانستی و ئایینییەکاندا هەبوو".

سەرۆکی هەرێمی کوردستان هەروەها لە پەیامەکەید ئاماژە بە رۆڵی ئەو کەسایەتییە لە سەر ئاستی کوردستان دەکات و رایدەگەیێنێت: "پرۆفیسۆر دکتۆر مستەفا لە سەر ئاستی کوردستان، راوێژی شەرعی و یاسایی پێشکەشی حکومەت و پەرلەمانی کوردستان کردووە و رۆڵێکی گرینگی لە هەموارکردنەوەی یاسای باری شارستانی و برەودان بە رەوتی میانڕۆی ئایینی و عەقڵانییەت و دژایەتی بیری تووندڕۆیی هەبوو".

كاژێر یەكی بەرەبەیانی رۆژی شەممە 4-6-2016 زانای ناوداری كورد و جیهانی ئیسلامی پرۆفیسۆر مستەفا زەڵمی لەنەخۆشخانەی پار لەشاری هەولێر كۆچی دوایی كرد.

دەقی پەیامەکەی سەرۆکی هەرێمی کوردستان

بەناوی خودای مەزن و دلۆڤان

بنەماڵەی بەڕێزی پرۆفیسۆر دکتۆر مستەفا زەڵمی

هەواڵی كۆچی دوایی بیرمەندی ناوداری کوردستان و جیهانی ئیسلامی و کەسایەتیی نیشتیمانپەروەری کوردستان، پرۆفیسۆر دکتۆر مستەفا زەڵمی خەمباری کردم.

دکتۆر مستەفا زەڵمی، وەک زانا و بیرمەندێکی بە ئەزموون و بەتوانا، کەسایەتییەکی گەورە و بەناوبانگی جیهانی ئیسلامی بوو و وەک عەللامە و بیرمەندێکی گەورە پێگەیەکی گرینگی لە ناوەندە زانستی و ئایینییەکاندا هەبوو و بەرهەمەکانی دەگاتە زیاتر لە ٧٠ کتێبی چاپکراو و چاپ نەکراو کە هەندێکیان لە زانکۆکاندا بوونەتە مەنهەج و بۆچوونەکانیشی لەسەر ئاستی جیهانی ئیسلامی جێگەی متمانە بوون.

پرۆفیسۆر دکتۆر مستەفا لە سەر ئاستی کوردستانیش، ڕاوێژی شەرعی و یاسایی پێشکەشی حکوومەت و پەرلەمانی کوردستان کردووە و ڕۆڵێکی گرینگی لە هەموارکردنەوەی یاسای باری شارستانی و برەودان بە ڕەوتی میانڕۆی ئایینی و عەقڵانییەت و دژایەتی بیری توندڕۆیی هەبوو و بەوەیش خزمەتێکی گەورەی پێشکەشی پێکەوەژیانی ئاشتییانە دەکرد و لەدەستدانی بۆ کوردستان و عێراق و جیهان، خەسارەتێکی گەورەیە.

لەم بۆنە خەمناکەدا لە دڵەوە سەرەخۆشی لە ئێوەی بەڕێز و کەسوکار و خزمان و ئاشنایانتان و سەرجەم مامۆستایانی ئایینیی کوردستان دەکەم و هاوبەشی خەمتانم.

لە خودای گەورە داواكارم گیانی پاکی دکتۆر مستەفا بباتە بەر ڕەحمەتی خۆی و دڵنەوایی و ئارامییش بە هەموو لایەك ببەخشێت.

انا لله و انا الیه راجعون

مسعود بارزانی

٤ـی ٦ـی ٢٠١٦