وه‌زاره‌تى ده‌ره‌وه‌ى رووسیا ئه‌و لێدوانانه‌ى ئه‌نقه‌ره‌ى ره‌تكرده‌وه‌ كه‌ باس له‌ پێدانى چه‌كى رووسى به‌ په‌كه‌كه‌ ده‌كه‌ن، جه‌ختیش ده‌كاته‌وه‌، كه‌ وڵاته‌كه‌یان به‌مه‌به‌ستى هاوكاریكردن له‌ شه‌ڕى دژ به‌ داعش، چه‌ك به‌ پێشمه‌رگه‌ ده‌دات.



ماریا زاخارۆڤا، گووته‌بێژ به‌ناوى وه‌زاره‌تى ده‌ره‌وه‌ى رووسیا، لێدوانه‌كانى ئه‌نقه‌ره‌ى به‌ ناڕاست وه‌سفكرد و ره‌تیكرده‌وه‌ چه‌كیان دابێت به‌ پارتى كرێكارانى كوردستان (pkk) وه‌ك ئاژانسى "سپۆتینك"ى رووسى، بڵاویكرده‌وه‌.



ئاماژه‌ى به‌وه‌شدا، كه‌ :" به‌پێچه‌وانه‌ى لێدوانه‌كانى ئه‌نقه‌ره‌، رووسیا به‌نایاسایی چه‌ك به‌هیچ لایه‌نێك نادات".

ئاشكراشیكرد، كه‌ وڵاته‌كه‌یان چه‌كی جۆراجۆرى دیاریكراوى به‌ هێزه‌كانى پێشمه‌رگه‌ داوه‌، به‌ڵام به‌هه‌ماهه‌نگى له‌گه‌ڵ حكوومه‌تى فیدڕاڵ له‌ به‌غدا.

روونیشیكرده‌وه‌، كه‌ رووسیا به‌شێوه‌یه‌كی روون و ئاشكرا ئه‌و چه‌كانه‌ ده‌داته‌ هێزه‌كانى پێشمه‌رگه‌ى كوردستان به‌مه‌به‌ستى هاوكاریكردنیان له‌ شه‌ڕى دژ به‌ داعش.









باسنیوز