ئه‌مڕۆ یەكشەم لە سەلاحەدین مەسعوود بارزانی سەرۆكی هەرێمی كوردستان پێشوازی لە شاندێكی بەرەی چاكسازی لە ئەنجوومەنی نوێنەرانی عێراق كرد و شاندی میوان ره‌خنه‌یان له‌ حكومه‌تی به‌غدا گرت كه‌ خه‌می له‌ ئه‌و عێراقییانه‌ نه‌خواردووه‌ كه‌ ئاواره‌ی ناوچه‌كانی كوردستان بوون، سه‌رۆكی هه‌رێمی كوردستانیش ئاماژه‌ی به‌وه‌ دا كه‌ پێویسته‌ گۆڕانكاری و چاره‌سه‌ری گرفته‌كان به‌ جۆرێك بێ زیان به‌ سه‌نگه‌ر و شه‌ڕی دژ به‌ تیرۆریستانی داعش نه‌گه‌یه‌نێت.

لە دیدارەكەدا شاندی میوان باسیان لەو هۆكارانە كرد كە هانی ئەوانی داوە لە بەرانبەر پڕۆسەی سیاسیی عێراق هەڵوێست وەربگرن و ڕێگەی مانگرتن بگرنە بەر. دواتر ئەجێندا و ئامانج و شێوازی كاركردنیان بۆ سەرۆكی هه‌رێم شی كردەوە و داوای سەرەتایەكی تازەیان بۆ عێراق و پڕۆسەی سیاسی كرد بە جۆرێك كە ئیدارەدانی هەڵە نەمێنێت و ڕێز لە ڕێككەوتنەكان و شەراكەت نێوان پێكهاتەكانی عێراق بگیرێت.

شاندی میوان سوپاسی هاوكاری و میوانداریی گەلی كوردستانیان كرد بۆ ئاوارە و لێقەوماوانی عێراقی و ڕەخنەشیان لە حكوومەتی عێراقی گرت كە خەمی ئاوارەكانی نەبووە وەك بڵێی هاووڵاتیی عێراق نەبن.

لەبەرانبەردا بارزانی جەختی لە پێویستی گۆڕانكاری و چارەسەركردنی گرفتەكان كردەوە و ئەوەیشی خستەڕوو شێواز و كاتی داواكاری و هەوڵدان بۆ گۆڕانكاری دەبێ لەبەرچاو بگیرێت بە جۆرێك كە زیان لە ڕووبەڕووبوونەوەی تیرۆریستانی داعش نەدات.

لە بەشێكی دیكەی كۆبوونەوەكە سەرۆك بارزانی باسی لە مێژوو و قۆناغەكانی دامەزراندنی دەوڵەتی عێراق و ئەو نەهامەتیانە كرد كە بەسەر گەلی كوردستاندا هاتووە و ڕۆشناییشی خستەسەر بۆچوونی هەرێمی كوردستان لەبارەی ڕووداوەكانی بەغدا بۆ شاندی میوان باس كرد.





وشه‌