وەزیری بەرگریی ئەمریکا پێشمەرگەی کوردستان وەک یەکێک لە بەهێزترین و کاریگەرترین هێزەکانی ڕۆژهەڵاتی ناوەڕاست دەناسێت. لە چاوپێکەوتنێکدا لەگەڵ کەناڵی (سی.ئێن.ئێن)ی ئەمریکی، ئاشتون کارتەر وەزیری بەرگریی ئەمریکا ڕایگەیاند: بەدڵنیاییەوە لەسەر گۆڕەپانی عێراق، هێزی پێشمەرگەی کوردستان لە بەهێزترین یەکە سەربازییەکانن لە ناوچەی ڕۆژهەڵاتی ناوەڕاست کە دژی چەکدارانی داعش دەجەنگن.

سەبارەت بە کوژرانی سەربازێکی ئەمریکیش لەلایەن داعشەوە، کارتەر وتی: کوژرانی سەربازێکمان کارێکی پاڵەوانانەیە، چونکە لەگەڵ بەهێزترین و کاریگەرترین یەکەی سەربازی لە ڕۆژهەڵاتی ناوەڕاست کاری دەکرد.

وەزیری بەرگریی ئەمریکا لە دیمانەکەی (سی.ئێن.ئێن)دا ئەوەی دووپات کردەوە کە ئەوەی پێویست بێت دەیکەن و لە هەوڵەکانیان بەردەوام دەبن بۆ شکستپێهێنانی داعش لە ناوچەکە.