سەرۆكی هەرێمی كوردستان پێشوازی لە جێگری سەرۆكی ویلایەتە یەكگرتووەكانی ئەمەریكا دەكات
دوای پێشوازیكردن و بەخێرهێنانی جێگری سەرۆكی ئەمەریكا و شاندی یاوەری، كۆبوونەوەیەكی دوو قۆڵی لەنێوان سەرۆك بارزانی و جێگری سەرۆكی ئەمەریكا بەڕێوەچوو. لەو كۆبوونەوەیەدا سەرۆك بارزانی بەناوی گەلی كوردستان سوپاسی سەرۆك و گەل و حكوومەتی ئەمەریكای كرد كە لە ڕووخاندنی دیكتاتۆرییەت و هەروەها شەڕی تیرۆریستان پشتیوانی گەلی كوردستان بوونە و سوپاسی پاڵپشتیی سەربازی و دارایی ئەمەریكایی كرد بۆ هێزی پێشمەرگەی كوردستان كە كاریگەریی هەبووە لە مسۆگەركردنی سەركەوتنەكانی هێزی پێشمەرگەی كوردستان.
هەروەها جێگری سەرۆكی ئەمەریكا پێزانینی بۆ سەركردایەتیی سەرۆك بارزانی و قوربانیدانی پێشمەرگە و خۆڕاگریی گەلی كوردستان هەبوو و سوپاسی هەڵوێستی هەرێمی كوردستانیشی كرد لە یارمەتیدانی پڕۆسەی سیاسیی عێراق و هەوڵدان بۆ گەڕاندنەوەی سەقامگیریی سیاسی.
لە بەشێكی دیكەی ئەم كۆبوونەوەیەدا باس لە دوا پێشهات و گۆڕانكارییە مەیدانییەكانی شەڕی تیرۆریستانی داعش لە عێراق و سووریا كرا و چۆنییەتی هەماهەنگی نێوان هێزی هاوپەیمانان و هێزی پێشمەرگە و هێزەكانی عێراقی لە شەڕی داعش و پلانی ئازادكردنی موسڵ و قۆناغی دوای ئازادكردنی موسڵ خرایە بەر باس و گفتوگۆ.
لە بەشێكی تری دیدارەكەدا سەرۆك بارزانی و جێگری سەرۆكی ئەمەریكا بیروڕایان لەبارەی قۆناغی دوای تێكشكاندنی تیرۆریستانی داعش و پێویستییەكانی ئەو قۆناغە لە گۆڕەپانی سیاسیی عێراق ئاڵوگۆڕ كرد.
تەوەرێكی دیكەی كۆبوونەوەكە لەبارەی پەیوەندییەكان و فراوانتركردنی هەماهەنگی لەنێوان هەردوولا بوو و باسی ئەوەیش كرا كە بۆ مامەڵەكردن لەگەڵ پێشهاتە سیاسی و ئەمنییەكانی عێراق و ناوچەكە لە ڕاوێژ و پەیوەندیی بەردەوامدا بن.
جێگەی ئاماژەكردنە لە پێشوازیكردنی جێگری سەرۆكی ئەمەریكا ژمارەیەك لە بەرپرسە سیاسی و ئەمنی و ئیدارییە باڵاكانی هەرێمی كوردستان ئامادە بوون.
