چەند نووسینێک کە دەگوترێت نووسینی سکرتێری ئەنجومەنی ناوەندیی یەکێتیی نیشتمانیی کوردستانە، کاردانەوە لە تۆڕە کۆمەڵایەتییەکان درووست دەکات.

دوای شەڕەکەی دوێنێ یەکشەممە 24\4\2016ی نێوان گەنجانی خورماتوو و میلیشیا شیعەکانی حەشدی شەعبی، لە تۆڕە کۆمەڵایەتییەکانەوە، نووسینێک بڵاو کرایەوە و ئاماژە بەوە درا کە لە لایەن عادل موراد، سکرتێری ئەنجومەنی ناوەندیی یەکێتییەوە بڵاوکراوەتەوە، کاردانەوەی بە دوای خۆیدا هێنا.


لە نووسینەکەدا ئاماژە بەوە دراوە کە لایەنێک بە مەبەست و بە پیلانی دەوڵەتێك، دەیەوێت ڕوشی ئارامیی خورماتوو بشێوێنێت و ئەو برایەتی و پێکەوەژیانەی چەند ساڵەی خەڵکی شارەکە لەبار ببات. دەشڵێت: ”ئەو لایەنە دەیەوێت خۆی فریشتەئاسا نیشان بدات و فرمێسکی تیمساحی بۆ خەڵکی خورماتوو دەڕێژێت، بەڵام خەڵکی بە شەرەفی خورماتوو پێویستە لە مەترسیی ئەو پیلانە گەورەیە ئاگادار بێت، چونکە ئە وڵاتە هی هەموومانە و جێی هەموومانی تێدا دەبێتەوە“. داواشی لە مامۆستایانی ئایینی و کەسایەتییەکانی خورماتوو کردووە، هەوڵەکانیان بۆ ئارامکردنەوەی دۆخەکە چڕ بکەنەوە.

ئەمە لە کاتێک دایە کە 2 ڕۆژ پێش ڕووداوەکانی خورماتوو، نووسینێکی دیکەی عادل موراد بڵاوکرایەوە و تێیدا بە ناوی (خۆبەخشە شیعەکان، هیوایەک بۆ ئایندە) ئاماژە بەوە درابوو: “تا دێت حکومەتی عێراقی تواناکانی لەدەست دەدات و ڕووبەڕووی ململانێی زیاتری لایەنی سوننی دەبێتەوە، ئەوەی ئەم ململانێیە یەکلا دەکاتەوە، ئەو گەنجە خوێن گەرمە شیعانەن کە لە چوارچێوەی (حەشدی شەعبی)دا خۆیان ڕێکخستووە کە تاڕادەیەك جێی دڵخۆشییە و ڕەنگە لە دواڕۆژدا ببێتە بەدیلی سوپای عێراقی“.

بۆ زانینی درووستیی ئەو نووسینانە، (باسنیوز) پەیوەندی بە عادل موراد، سکرتێری ئەنجومەنی ناوەندیی یەکێتیی نیشتمانیی کوردستانەوە کرد و لەمبارەیەوە ڕای گەیاند: ”من لە دەرەوەی وڵاتم و ئاگام لە بارودۆخی خورماتوو نییە“. باسیشی لەوە کرد کە ئەو یەک پەیجی لە تۆڕی کۆمەڵایەتیی (فەیسبووک) هەیە.

هەر لەمبارەیەوە سەرچاوەیەکی نزیک لە عادل موراد، تایبەت بە (باسنیوز)ی ڕاگەیاند: ”هەرچەندە عادل موراد نکۆڵی لەو نووسینانە دەکات، بەڵام هیچ لارییەکی لەسەر نووسینەکان نییە و لەگەڵ ناوەڕۆکیان هاوڕایە“.

شەوی شەممە لەسەر یەکشەممەی ئەم هەفتەیە، میلیشیا شیعەکان هێرشیان کردە سەر ماڵی هاووڵاتییەکی کورد و دواتر فەرماندەیەکی پێشمەرگەیان شەهید کرد، بەو هۆیەشەوە شەڕ لەنێوان گەنجانی کوردی خورماتوو و حەشدی شەعبی درووست بوو، بەڵام فەرماندەکانی پێشمەرگە کە لەژێر سەرکردایەتیی فەرماندە سەربازییەکانی یەکێتیی نیشتمانیی کوردستان دان، فەرمانیان بە پێشمەرگە کرد، بەشداری لە شەڕەکەدا نەکەن و دواتر نەجمەدین کەریم، پارێزگاری کەرکووک و ئەندامی مەکتەبی سیاسیی یەکێتیی نیشتمانیی کوردستان، لەگەڵ هادی عامری، فەرماندەی گشتیی میلیشیا شیعەکان، لە خورماتوو کۆبووەوە و بە ڕێککەوتنێک، بڕیاری کشاندنەوەی پێشمەرگەی لە شارەکە دەرکرد.