جەژنا سه‌رسالا ئێزدییان "چارشەمبوا سۆر" یا كوردێن ئێزدی، ل ڕێزداران میر و باباشێخ و جڤاتا ڕۆحانی و لالشا نوورانی و هەمی خوشك و برایێن ئێزدی پیرۆز دكەین و هیڤیدارین ئەڤ جەژن ببیتە خێر و خوەشی ژبۆ هه‌مى كوردستانێ و ب تایبەتی ژبۆ خوشك و برایێن ئێزدی.

ئەم د دەمەكێدا ڤێ جەژنێ پیرۆز دكەین، شه‌هید و قوربانى یێن خوشك و برایێن ئێزدى ژى ب بیر تینین و گەلەك باش هه‌ستێ ب ئێش و دەرد و سەرهاتی یێن ئێزدییان دكه‌ین. هیڤیدارین ئەڤ جەژنە ببیتە گاڤەك ژبۆ چارەسەركرنا هەمی برین و ئێشێن كو ب سەرێ كوردێن ئێزدی هاتنه‌ و گرتییێن وان یێن دەستێ تیرۆرستان ڕزگار ببن و ئاوارە ژی ڤەگەرن سەر جی و وارێن خوه‌.

حكوومەتا هەرێما كوردستانێ د هه‌ولێن به‌رده‌وامدایه‌ داكو هەمى تاوانێن له‌ هه‌مبه‌رى كوردێن ئێزدی هاتینە كرن، وه‌ك جینۆساید بێنه ‌ناسكرن، هەروەسا دێ ب هه‌مى شێوه‌یه‌كى ژى لسه‌ر ڕزگاركرنا خوشك و برایێن مه‌ یێن ئێزدی ژ دەستێ تیرۆرستان، به‌رده‌وام بیت. دێ هەولێن بەردەوام ژی ده‌ت كو ب ئالیكاریا جڤاكا ناڤنەتەوەیی دەڤەرێن ڕزگاركری ب ئاواكی گشتی و یێن كوردێن ئێزدی ب تایبەتی، بهێنە ئاڤه‌دانكرن و ئارامى و ئاسایش تێدا بهێتە بجهكرن.
دوباره‌ جەژنا سه‌رسالا ئێزدییان "چارەشەمبوا سۆر"، ل هەمى خوشك و برایێن كوردێن ئێزدی پیرۆز دكەین.

حكوومەتا هەرێما كوردستانێ
19 - 4 - 2016