جێگری سەرۆكی پەرلەمانی كوردستان ده‌ڵێت،ئەم كردەوە تیرۆریستییانەی شاری برۆكسێل ئەو راستیە دەسەلمێنێت كە شەڕی دژی تیرۆر شەڕێكی جیهانییە و هەرەشەیەكی راستەقینەیە لەسەر هەموو وڵاتانی ئازاد و دیموكرات، بۆیە پێویستە كۆمەڵگای نێودەوڵەتی زیاتر هەست بە مەینەت و ئازارەكانی گەلی كوردستان بكات و بە گڕوتینێكی زیاترەوە پشتیوانی ئەم هەرێمە بكات بۆ لەناوبردن و بنبڕكردنی تیرۆر.

لە رۆژی 22 ئاداری 2016 دا تیرۆریستانی داعش، لە كردەوەیەكی دڕندانەدا، شاری برۆكسێلی پایتەختی بەلژیكایان كردە ئارمانج و لە ئەنجامی سێ تەقینەوەدا بەدەیان هاووڵاتی بێتاوان گیانیان لەدەستداو ژمارەیەكی زۆریش برینداربوون.

لە كاتێكدا ئەم كردەوە قیزەوەنە ریسواو ئیدانە دەكەین، هاوسۆزی و هاوخەمی خۆمان بۆ گەل و حكوومەتی بەلژیكا دەردەبڕین و سەرەخۆشی لە كەسوكاری قوربانییان دەكەین و هیوای چاكبوونەوەی بەپەلە بۆ بریندارەكان دەخوازین.

ئێمە لە هەرێمی كوردستان، وەكو بەرگریكەری پێشەوەی سەنگەری جیهان لە شەری دژی تیرۆردا، هەست بە ئازار و دەرهاوێشتە خڕاپەكانی ئەم شەرە سەپێندراوە دەكەین، بەڵام سووربوونمان لەسەر كۆتاییهێنانی ئەم شەڕە لە بەرژەوەندی جیهانی ئازاددا دووپاتدەكەینەوە .

ئەم كردەوە تیرۆریستییانەی شاری برۆكسێل ئەو راستیە دەسەلمێنێت كە شەڕی دژی تیرۆر شەڕێكی جیهانییە و هەرەشەیەكی راستەقینەیە لەسەر هەموو وڵاتانی ئازاد و دیموكراتدا، بۆیە پێویستە كۆمەڵگای نێودەوڵەتی زیاتر هەست بە مەینەت و ئازارەكانی گەلی كوردستان بكات و بە گڕوتینێكی زیاترەوەو پشتیوانی ئەم هەرێمە بكات بۆ لەناوبردن و بنبڕكردنی تیرۆر.

دكتۆر جەعفەر ئیبراهیم ئێمینكی

جێگری سەرۆكی پەرلەمانی كوردستان

23/3/2016