سەرۆکی دەستەی دەستپاکی کوردستان رایگەیاند لە کۆی ئەو ١٠٨٠ فۆڕمەی بە سەر ئەندامانی پەرلەمان و ئەنجوومەنی دادوەری کوردستان دابەشکراوە، تەنیا ٨٢٤ فۆڕم بۆ دەستەی دەستپاکی کوردستان گەڕاوەتەوە.

ئەنوەر ئەحمەد مستەفا لە كۆنگرەیەکی ڕۆژنامەوانی دا ڕایگەیاند: لە کۆی ئەو ١٠٨٠ فۆڕمەی سێ مانگ لەمەو بەر بە سەر پەرلەمانی كوردستان و ئەنجوومەنی دادوەری كوردستان دابەشکراوە هەتا ئێستاکە تەنیا ٨٢٤ فۆڕمیان گەڕاوەتەوە.

ناوبراو رایگەیاند: سەرجەم ئەندامانی ئەنجوومەنی دادوەری كوردستان فۆڕمەكانیان پڕكردۆتەوەو لە کۆی ١١١ ئەندام پەرلەمانی کوردستانیش ٨٦ ئەندام، فۆڕمەكانیان پڕ كردۆتەوە.

سەرۆكی دەستەی دەستپاكی گووتی: بۆ لێكۆڵینەوە لە فۆڕمە پڕکراوەکان و دامەزراندنی دادگای لێكۆڵینەوەی سەربە دەستەی دەستپاكی كوردستان، داوامان لە ئەنجوومەنی دادوەری كردووە سێ دادوەرمان بۆ دابین بكەن.

ئەنوەر ئەحمەد مستەفا رایگەیاند: ئێستاكە چاوەڕوانی فۆرمی پركراوەی سەرۆكایەتی هەرێمی كوردستانین و رەنگە لە ئایندەیەكی نزیكدا ئەو فۆرمانەمان بەدەست بگات.