لە وتارێكی تایبەتدا بۆ گۆڤاری گوڵان پرۆفیسۆر مایكل گەنتەر گوتی: لە دوای 7ی ئازاری ساڵی 2010ەوە، عێراق(بە دڵنیاییەوە، لە نێویدا (هەرێمی كوردستان)یش یەكەمین هەڵبژاردنی پەرلەمانی گشتیی خۆی لە 30 نیسانی ساڵی 2014دا ئەنجامدا. هەروەها ئەمە یەكەمین هەڵبژاردن بوو لە دوای كشانەوەی هێزەكانی ئەمەریكا لە كۆتایی ساڵی 2011دا ئەنجام بدرێت. ئەگەرچی هەڵبژاردنەكە بە ئەندازەیەكی گەورە بێ توندوتیژی تێپەڕی و ئەنجام درا، بەڵام هێشتا هەندێ كەس ئەم هەڵبژاردنانە بە دووبارە ڕێكخستنەوەی جڵەوی كەشتی تایتانیك دەشوبهێنن، پێش ئەوەی ژێر ئاو بكەوێت. وەزیری دەرەوەی ئەمەریكا جۆن ئێف كێری بانگەشەی ئەوەشی كرد كە عێراقییەكان بوێرانە دەنگیان دا و زۆر بە توندی توندڕۆ توندوتیژەكانیان ڕەت كردەوە، ئەوانەی هەوڵی لەباربردنی پرۆسەی دیموكراتی و چاندنی تۆوی دووبەرەكیان دەدا لە عێراق و سەرتاسەری ناوچەكەدا. ئەگەر تەنیا ئەمەیان ڕاست بێت!
هەروەها لە درێژەی وتارەكەیدا مایكل گوتی: پێدەچێت عێراق بە بەرچاومانەوە داتەپێت، لەبەر ئەوەی گروپە ئیسلامییەكانی سوننە ڕادیكاڵ و توندوتیژەكان بەشێكی زۆری خاكی وڵاتەكەیان داگیر كردووە و نزیكەی 60 میل لە بەغداوە دوورن. ئەم بەشانەی عێراق لە واقیعدا بەشێكن لە شەڕی ناوخۆیی هەڵگیرساوی سوریا كە تێیدا ئۆپۆزسیۆنی بەشار ئەسەد بە ڕاددەیەكی زۆر لەلایەن هەمان توندڕەوە سوننەكانەوە كۆنترۆڵ كراوە كە هاوسۆزن بۆ ئەلقاعیدە. لەوەش زیاتر، میلیشیا خێڵەكییەكانیش لە پارێزگای ئەنبار لە هەندێ شوێندا شەڕ لە دژی یەكتری دەكەن، بەمەش ئەوەندەی دیكە بارودۆخەكە ئاڵۆز دەكەن. هەرچۆنێك بێت، نوری ئەلمالیكی سەرۆكی وەزیرانی ئێستای عیراق پاڵنەرێكی كەمی بۆ سوننەكانی عێراق دروست كردووە بۆ ئەوەی پشتیوانی عێراقێكی یەكگرتوو بكەن، كە زیاتر و زیاتر ئەوەیان لا روون دەبێتەوە كە شوێنێك بۆ ئەوان لە وڵاتەكەدا نەماوە، چونكە ئەو وڵاتە لەلایەن شیعەكانەوە كۆنتڕۆڵ كراوە.
هەروەها گەنتەر گوتی: هەڵبژاردنەكانی پێشوو كە لە ساڵی 2010دا ئەنجامدران، سەریانكێشا بۆ ئیفلیجبوونی حكومەت بۆ پتر لە نۆ مانگ پێش ئەوەی مالیكی لە كۆتاییدا بتوانێت حكومەتە نوێیەكەی و دووەم حكومەتی خۆی پێكبهێنێت. لەگەڵ ئەوەشدا، تەنانەت ئەم پرۆسە قورس و ئاڵۆزە بە تەواوەتی سەری نەكێشا بۆ حكومەتێكی دیموكراتی، لەبەر ئەوەی مالیكی نەیتوانی( یاخود ڕەنگە نەیویستبێت) كەسانێك بدۆزێتەوە بۆ پڕكردنەوەی گرنگترین پۆستەكانی حكومەتەكەی. لە دەرئەنجامدا، مالیكی خۆی ئەم پۆستە گرنگانەی بە دەستەوە گرت. بەو پێیە، هەرگیز حكومەتە نوێیەكە لە دوای هەڵبژاردنەكانی ساڵی 2010ەوە بە مانا ڕاستەقینەكەی پێك نەهات.


درێژەی ئەم بابەتە لە گۆڤاری گوڵان ژمارە(976)دا بخوێنەوە.