30ی‌ ئایار/ مایۆ (گوڵان میدیا)- رۆژنامەی شەرق ئەوسەت لەژێر تیشكی دیمانەكەی گوڵان لەگەڵ بەڕێز عەدنان موفتی، ئەمڕۆ پێنجشەممە لە راپۆرتێكدا بڵاوی كردووەتەوە: لەنێوان ئەو مشتومڕەی ئێستا لەسەر پرۆژەی دەستووری هەرێمی كوردستان هەیە و دوای سووربوونی سەرۆكی هەرێمی كوردستان كە دەبێ دەستوور بكرێتە راپرسیەوە و لەگەڵ ئەوەی هێزەكانی ئۆپۆزسیۆن كۆدەنگن لەگەڕانەوەی بۆ پەرلەمان و دوای ئەوەی یەكێتی نیشتیمانی كوردستانیش بۆچوونی خۆی بەهەمان شێوەی ئۆپۆزسیۆن دەربڕێ، بەڵام عەدنان موفتی، سەرۆكی پێشووتری پەرلەمان و ئەندامەی مەكتەبی سیاسی یەكێتی نیشتیمانی كوردستان، لە دیمانەیەكی گۆڤاری گوڵان، پشتیوانی خۆی بۆ بارزانی دەردەبڕێ.

لەدوای بڵاوبوونەوەی دیمانەی تایبەتی گۆڤاری گوڵان لەگەڵ بەڕێز عەدنان موفتی، سەرۆكی پێشتووتری پەرلەمانی كوردستان، دەنگدانەوەی فراوانی لەنێو راگەیاندنە نێوخۆیی و عەرەبی و جیهانیەكان دروستكرد، ئەوەش لەدوای ئەو دەنگۆیەبوو كە گوایە یەكێتی نیشتیمانی بۆچوونی جیای لەگەڵ هاوپەیمانەكەیدا هەیە و دەیەوێ دەستوور بگەڕێتەوە پەرلەمان، بەڵام موفتی وەك ئەندامی مەكتەبی سیاسی یەكێتی نیشتیمان و وەك سەرۆكی ئەوكاتەی پەرلەمان كە دەنگدان بۆ دەستوور كراوە رایگەیاند كە دەستوور هەموو قۆناخە یاساییەكانی بڕیوە و ئێستا دەبێ راپرسی بۆ بكرێ.

عەدنان موفتی لە دیمانەكەیدا لەگەڵ گۆڤاری گوڵان-ی پارتی دیموكراتی كوردستان دەڵێ: دوای نووسینەوەی پرۆژەی دەستوور، پێشكەشی پەرلەمان كرا و لە پەرلەمانیش دەنگی لەسەر درا، پاشان رەوانەی سەرۆكی هەرێمی كوردستان كرا و پەسەندی كرد، بۆیە ئێستا لەرووی یاساییەوە لەدەست سەرۆكایەتی هەرێمیش نییە، بەڵكو دەبێ گەل دەنگی لەسەر بدات و نابێ بگەڕێندرێتەوە پەرلەمان.

هەروەها دەڵێ: پرۆژەی دەستوور هەموو لایەنە یاساییەكانی تەواو كردووە و ئێستا ئامادەیە تا بخرێتە راپرسیەوە و لەرووی یاساییەوە نابێ بگەڕێتەوە پەرلەمان، بەڵام ئەگەر كۆدەنگی تەواو هەبوو لەسەر گەڕانەوەی، ئەوكاتە رێگەیەكی یاسایی دەدۆزرێتەوە تا بتوانرێ بگەڕێتەوە پەرلەمان و هەموار بكرێتەوە.