12ی‌ ئایار/ مایۆ (گوڵان میدیا)- 51 ساڵ لەمەوبەر ڕۆژنامەیەكی یۆنانی ڕاپۆرتێكی لەسەر كورد و بزووتنەوە ڕزگاریخوازەكەی بڵاو كردووەتەوە و تێیدا ئاماژە بە ڕۆڵی مستەفا بارزانی كراوە و بە وروژێنەری ڕۆژهەڵاتی ناوەڕاست ناو براوە؛ هاوكات وڵاتانی ناوچەكەیش لەسەر ئەو باوەوڕە بوون كە بارزانی دەیەوێت كوردستانی گەورە دروست بكات. ڕۆژنامەیەكی دیکەیش نووسیویەتی دۆزی کورد كاریگەرییەكی زۆری لە مەسەلە گرنگەكانی یۆناندا هەیە.
\"كورد لە ئەرشیڤی یۆنانییەكاندا\"" سەردێری ئەو باسەیە كە لە زنجیرە وتارێكدا هەفتەنامەی \""باس\"" لە ٣ ژمارەی ڕابردوویدا هەندێكی ئەرشیڤی یۆنانییەكان ئەوی پێوەست بە كورد و بزووتنەوە ڕزگاریخوازەكەیەتی، خستووەتە ڕوو. ئاژانسی هەواڵی پەیامنێریش بە هەمان شێوە و بە هۆی بایەخی باسەكەوە بە پێویستی زانی چەند بابەتێکی لێ بڵاو بكاتەوە.
ڕۆژی سێشەممە 23ـی كانوونی دووەمی ساڵی 1962 واتە پتر لە 51 ساڵ بەر لە ئێستا، ڕۆژنامەی \""تانەیا\""ـی یۆنانی، ئەم ڕاپۆرتەی لەسەر كورد بڵاو كردووەتەوە:
\""مستەفا بارزانی سەرۆكی ئەمڕۆی كوردەكان، یەكێك لە نەوەكانی پاشا سەڵاحەددین ئەییوبی ئەفسانەیی، دەیەوێت نیزامی قاسم بڕووخێنێت و هەموو ڕۆژهەڵاتی ناوەڕاست بوروژێنێت.
مەلا مستەفا بارزانی تەمەنی 64 ساڵە و كەسێكی بە توانایە و تایبەتمەندییەكی هەیە كە ئەویش ئەوەیە زوو زوو كوردەكان دەوروژێنێت، ئەمجارە دەستی كردووە بە خەباتێكی بەردەوام دژبە ڕژێمی حوكمی عێراق، مانگی ئەیلوولی ڕابردوو شەڕی زۆر گەرمی لەگەڵ سوپای عێراقدا كرد و دەستی بەسەر زۆر ناوچەدا گرت، ڕادیۆی بەغدا وای ڕاگەیاند كە كوردە هەڵگەڕاوەكانی تێكشكاندووە، بەڵام ئەمە زۆر لە ڕاستییەوە دوورە، سەرهەڵدانی كوردەكان كەس ناتوانێت لەناوی ببات.
بەڵام كوردەكان كێن؟ چییان دەوێت؟ لەگەڵ كێدا؟ كێشەی كورد ئێستا و هەر لە كۆنەوە كێشەیەكی چارەنەكراوە، ئەمڕۆ كەس نازانێ چییان دەوێت. زۆر لە كوردەكان لەگەڵ قاسمدان و زۆری تریش دژبە ئەون، بۆ سەرۆكەكەیشیان بارزانی، هەندێك دەڵێن كە سەربە ڕووسیایە و هەندێكیش دەڵێن سەربە ڕۆژاوایە، سەرۆككۆماری عێراق دەڵێ كە سەربە ئیمپریالیستەكانە، سووریا و لوبنان بەوە تۆمەتباری دەكەن كە مەبەستێكی هەیە و دەیەوێت كوردستانی گەورە دروست بكات لەسەر سنوورەكانی ئەوان. بەڵام كەس نازانێت ڕاستی لە كوێدایە.
كوردەكان ئەمڕۆ 12 ملیۆنن و لە نێوان پێنج وڵاتدا دەژین: عێراق، ئێران، سووریا، توركیا و یەكیەتیی سۆڤیێت، دانیشتوانی ئەمڕۆی عێراق پێنج ملیۆنە و دوو ملیۆنی كوردن و ئەمڕۆ دژبە نیزامی حوكم وەستاون و دەتوانن زۆر كێشەی گەورە بۆ قاسم دروست بكەن، مەملەكەتی كوردەكان مێژوویەكی كۆینی هەیە كە زۆر لە پێش سەرهەڵدانی ئایینی مەسیحییەتەوەیە، لە ڕاستیدا 25 سەدە پێش سەرهەڵدانی مەسیح مەملەكەتی كوردەكان سووریا و میسریشی گرتبووە خۆی و لە كاتی پاشا سەڵاحەددیندا زۆر بەناووبانگ بوو، هەروەها وا باس دەكرێت كە سوارچاكە كوردەكان لەگەڵ پاشا \""كیرۆ\""ـدا دەستیان گرتبوو بەسەر بابل و نەینەوادا.
تا سەدەی پێشوویش كوردستان وڵاتێكی ئاوەدان بوو، سنوورەكانی لە دەریای ڕەشەوە دەستی پێ دەكرد تا كەنداوی فارس. كوردەكان دابونەریتی خۆیان پاراستووە و تەنانەت ئەمڕۆیش بە ئازاترین نەتەوەی ڕۆژهەڵاتی ناوەڕاست ناسراون. ڕەشتاڵەن، لەشیبَكی بەهێزیان هەیە و زۆر خۆڕاگرن بەرانبەر بە ناخۆشییەكان و بە باشترین سورچاك لەقەڵەم دەدرێن، ئافرەتەكانیان جوانن و تاتوو لەسەر دەموچاو و دەست و مەچەكیان دەكەن، سەرۆكی ئەمڕۆیان مەلا مستەفا كە هەست بە چەوسانەوەی كوردەكان دەكات، خەبات دەكات بۆ دروستكردنی ئارامگەیەك بۆیان. مەلا مستەفا دەڵێت: دراوسێكانمان خاكەكەمانیان داگیر كردووە، هەموویان دژبە ئێمەن، چیتر ناتوانین بەم شێوەیە بەردەیوام بین.
باوكی بارزانی دژبە توركەكان شۆڕشی كردبوو، كە توركەكان گرتیان لە ساڵی 1908 لەداریان دا، ئەمڕۆ وەك پالەَوانێكی نەتەوەیی تەماشای دەكرێت، براكەی سەرۆكایەتیی سەرهەڵدانێكی دژبە حكوومەتی عێراق كرد لە ساڵی 1930ـدا، دوای ئەوەیش كوردەكان دژبە ئینگلیز ڕاوەستان و لەو كاتەدا ئینگلیزەكان شار و دێكانیانی بۆردومان دەكرد، ئەمڕۆ كوردەكان دژبە حكوومەتی عێراق وەستاون، بەڵام لەوە ناچێت جارێ بتەوانن ئاواتەكانیان بهێننە دی.\""

دۆزی كورد كارتێكی گرنگە بۆ پرسی قوبرس
\""لە 29/5/1975ـدا، نووسەر و ڕۆژنامەنووسی یۆنانی، نیكۆ لەڤێنداكوو، لە ڕۆژنامەی (ئیكۆنۆمیكۆس تاخی درۆمۆس)ـدا ئەم بابەتەی لەبارەی كوردەوە نووسیوە:
لە گفتوگۆكانی نێو پەرلەماندا، ب مەسەلەی قوبرس ئەو پرسیارەی خۆی دووبارە دەكردەوە كە: ئایا ئەو توندڕۆییەی توركیا پێوەندیی بە گرفتە نێوخۆییەكانییەوە هەیە یا دەستی وڵاتانی گەورەی تێدایە، شتێكی ئاشكرایە كە سیاسەتی دەرەوەی توركیا و هەموو هەموو وڵاتێكی بچووك پێوەستە بە سیاسەتی دەرەوەی وڵاتە گەورەكانەوە، هەرەوەها بۆ زیاتر تێگەییشتن و بوونی هەڵوێستێكی ڕاستتربەرانبەر ئەو توندوتیژییەی توركیا وا لە خوارەوە باس لە كێشە نێوخۆییەكانی توركیا دەكەین، كە یەكێكیان زۆربوونی ژمارەی دانیشتوانی توركیایە و ئەوی دیكەیشیان كێشەی زانراو لای هەموومان كێشەی كوردە لە توركیا.
ڕووداوەكانی ئەم دواییەی كوردستانی عێراق، سەرنجی ڕای نێودەوڵەتیی بەلای خۆیدا ڕاكێشا و جارێكی دی كێشەی چارەنەكراوی كوردی خستە ڕوو، شتێكی سەیرە كە دەوڵەتەكەی ئێمە تا ئێستا لە گرنگیی مەسەلەی كورد نەگەییشتوونە و سیاسەتێكی دیاریكراو و ڕوونی نییە بۆ مامەڵاَەكردن لەگەڵیدا.
وڵاتەكەمان هێشتا هەر وەك باوە لامان، ئەو سیاسیەتی گوێپێنەدانە بۆ مامەڵكردن لەگەڵ كێشە گرنگەكاندا پێڕۆ دەكات، كە پێویستی بە بوونی سیاسەتێكی دیاریكراو هەیە لەسەر ئاستی نێودەوڵەتی.
بەلای دەوڵەتەكەمانەوە(یۆنان) كێشەی كورد كێشەیەكی ناوخۆی توركیا و عێراق و سووریایە، ئەمە ڕاستە بەڵام لەگەڵ ئەوەیشدا كاریگەرییەكی زۆری لە مەسەلە گرنگەكانی ئێمەدا هەیە، لە گفتوگۆكانی ئەم دواییەی ئەنجوومەنی ئاساییشدا دەربارەی قوبرس، عێراق بە ئاشكرا لایەنی توركیای گرت و هۆی ئەمەیش ئاشكرا و سادەیە كە كاتی خۆی ئێران زۆری بۆ عێراق هێنابوو بە هۆی مەسەلەی كوردەوە، لەبەر ئەوە عێراق دەیەوێت پێوەندییەكی باش و هاوڕێیانەی لەگەڵ توركیادا هەبێ بۆ مەسەلەی قوبرس، بۆ ئەوەی توركیایش لایەنی بگرێت لە دۆزی كورددا، ئەمەیش گرنگیی دۆزی كورد نیشان دەدات بۆ نەتەوەكەمان، چونكە كەس لەو باوەڕەدا نییە كە خیانەتەكەی شای ئێران لە كوردەكانی عێراق بتەوانێت خەباتی نەتەوەیەك كۆتایی پێ بهێنێت بۆ ڕزگاری، كە سەدان ساڵە دەستیان پێ كردووە، هەروەها یارمەتییەكەی شای ئێران تەنیا ماوەی سێ مانگی خایاند، تا ئەو كاتە كوردەكان فێر بوون كە خۆیان بە تەنیا خەبات بكەن، بەبێ بوونی یارمەتی لە هیچ شوێنێكەوە دژبە حكوومەتەكانی عێراق، توركیا، ئێران و سووریایش، دوای ڕێككەوتننامەی جەزایر شەڕی پارتیزانی لە لایەن بەشێكی زۆری پێشمەرگەوە دەستی پێ كردووەتەوە.
گەرچی ڕووداوەكانی ئەم دواییەی كوردستانی عێراق سەرنجی نێودەوڵەیتی بۆ لای خۆی ڕاكێشا، بەڵام مەسەلەی كورد لە توركیا زۆر گرنگترە، چونكە هەرچەندە لەوانەیە شتێكی سەیر بێت، بەڵام كوردەكانی توركیا زیاتر چەوساوەن لە كوردەكانی عێراق و هەروەها ژمارەی كوردەكانی توركیا زۆر زیاترن، لەبەر ئەوە دەبێت یۆنان سیاسەتێكی ڕوون و دیاریكراوی هەبێت بەرانبەری تا كاتمان بە دەستەوە ماوە.
كێشەیەكی دیكەی توركیا وەك گوتمان، كێشەی دانیشتوانیەتی كە ژمارەیان زۆر زیادی كردووە و چاوەڕوان دەكرێت كە ساڵی 1990 ژمارەیان بگاتە 70 ملیۆن و بەپێی چاودێرەكانی توركیا زۆر زەحمەتە توركیا بتوانێت نانی 70 ملیۆن كەس بدات لە چناو چوارچێوەی سنوورەكانی خۆیدا.\"""