بۆ به‌ڕێزان سه‌رنووسه‌ر و گشت رۆژنامه‌نووس و ڕاگه‌یاندنکارانی گۆڤاری ئازیزی گوڵان
به‌ بۆنه‌ی بیسته‌مین ساڵیادی ده‌رچوونی گۆڤاری گوڵانه‌وه‌ پیرۆزباییه‌کی گه‌رمتان ئاڕاسته‌ ده‌که‌م. گۆڤاری گوڵان ئه‌زموونێکی سه‌رکه‌وتووی بواری رۆژنامه‌گه‌ریی کوردییه‌. من له‌ خوێنه‌رانی به‌رده‌وامی گۆڤاری ئازیزی گوڵانم و ئه‌م گۆڤاره‌ سه‌نگ و به‌های تایبه‌ت به‌ خۆی هه‌یه‌و توانیویه‌تی به‌ کارکردن له‌ سه‌ر ته‌وه‌ره‌ سیاسی و کۆمه‌ڵایه‌تی و ئابووریه‌ گرینگه‌کان، گفتوگۆی گرینگ له‌ سه‌ر لاپه‌ڕه‌کانی ساز بکات و خوێنه‌ری کورد ئاشنای بیروبۆچوونی زۆر هزرڤان و توێژه‌ری ناوخۆیی وده‌ره‌وه‌ بکات.
وه‌ک خوێنه‌رێکی گوڵان خوازیارم که‌ پێشکه‌وتن وتازه‌گه‌ریی زیاتر به‌ دیزاین و ناوه‌ڕۆک و چه‌ندی و جۆریی بابه‌ته‌کانه‌وه‌ ببینم و هیوادارم له‌ ئاستی تۆڕی ئه‌نته‌رنێتیشدا چالاکتر بن و بابه‌ته‌کانتان بخرێته‌ به‌ر دیده‌ی زۆرترین خوێنه‌رانی کوردی تاراوگه‌. ئاواتم سه‌رکه‌وتن وبه‌رده‌وامیتانه‌.

براتان
مه‌سرور بارزانی