سی دی تایبەت بە قورئان بۆ پرسەی هاووڵاتیان ئامادە دەكرێت
بەرپرسی راگەیاندنی وەزارەتی ئەوقاف و كاروباری ئاینی، مەریوان نەقشبەندنی، بە ئاژانسی هەواڵی پەیامنێری راگەیاند: مامۆستا مەلا مسلم فریزی كەئیمام و خەتیبی مزگەوتی \"مەلا صالح\""ە لەشارەدێی كەسنەزانی هەولێر كۆبونەوەی لەگەڵ ئەهلی مزگەوت و دانیشتوانی گەرەكەكەی ئەنجامداوە و بڕیاری ئەوەیان داوە كە چیتر لەرێورەسمی پرسەدا بۆ قورئانخوێندن، قورئانخوێن بەپارە نەهێنن و لەجیاتی ئەوە بەجیهازێكی سی دی و بەدەنگی قورئانخوێنە دەنگخۆشەكان لەپرسەی هەژار و دەوڵەمەندەكاندا قورئان دەخوێندرێت و بۆ ئەو مەبەستەش سی دی تایبەت بەپرسە ئامادەكراوە و چیتر خاوەن پرسە خەرجی قورئانخوێندنی نامێنێت و قورئانی پیرۆزیش بەهەڵە ناخوێنرێت.
مەیوان نەقشبەندنی، ئاماژەشیدا: سەبارەت بەم دەستپێشخەریەی مامۆستا مسلم پەیوەندی بەچەندین مامۆستا و زانای ئاینی ناوچە جیاجیاكانی كوردستان كردووە و تێكڕای ئەو بەڕێزانە دەستخۆشی ئەم هەنگاوەیان كردووە و هەریەكەیان بەڵێنی كۆتایی بەكێشەی قورئانخوێندنی هەڵە و كرێی قورئانخوێندن لەپرسەكاندا بهێنن.
شایانی باسە، كرێی قورئانخوێندن لەپرسەكاندا و هەڵەی هەندێ لە قورئانخوێنەكان دوو كێشەی گەورەیە لەكوردستان و بەهەزاران كەس بۆ چارەسەركردنی داوا لەوەزارەتی ئەوقاف دەكەن."
