18 شوبات / فه‌برایه‌ر 2013 (گوڵان میدیا)- د. دیندار زێبارى یاریده‌ده‌رى به‌رپرسى فه‌رمانگه‌ى په‌یوه‌ندییه‌كانى ده‌ره‌وه‌ رِایگه‌یاند: له‌ئێستادا تێكرِاى ژماره‌ى په‌نابه‌ران له‌ كوردستان گه‌یشتۆته‌ 83.958 په‌نابه‌رو له‌كۆى ئه‌و ژماره‌یه‌ 74.994 په‌نابه‌ر له‌ هه‌رێمى كوردستان نیشته‌جێن. دواتر ئاماژه‌ى دا به‌وه‌ى كه‌ په‌نابه‌ران دابه‌ش بوون به‌سه‌ر هه‌رسىَ شاره‌كانى هه‌رێمى كوردستان به‌رِێژه‌ى جیاواز، شارى هه‌ولێر 15.989 په‌نابه‌ر، شارى سلێمانى 4.311 په‌نابه‌ر وه‌ شارى دهۆكیش كه‌ زۆرترین ژماره‌ى په‌نابه‌رانى لێیه‌ رِێَژه‌كه‌ى ده‌گاته‌ 54.694 په‌نابه‌ر وه‌ به‌شى زۆرى په‌نابه‌رانى ئه‌و شاره‌ له‌ كه‌مپى دومیز نیشته‌جێن كه‌ ژماره‌یان ده‌گاته‌ 30.000 په‌نابه‌ر.

له‌لایه‌كى دیكه‌وه‌ باسى له‌هاتنى په‌نابه‌ران كرد له‌سوریاوه‌ بۆناو خاكى عێراق له‌هه‌ر سىَ خاڵه‌ سنووریه‌كانى (ئه‌لقه‌ییم، ئه‌لره‌بیعه‌، ئه‌لوه‌لید)، دێنه‌ ناو هه‌رێمى كوردستان كه‌ له‌ماوه‌ى دوو هه‌فته‌ى رِابردوو 7319 په‌نابه‌ر هاتوونه‌ته‌ ناو هه‌رێمى كوردستان، به‌شێكى زۆر ئه‌و په‌نابه‌رانه‌ش خه‌ڵكى شاره‌كانى قامیشلو و دیمه‌شق و حه‌له‌بن.

زێباری گوه‌تیشی: پێداویستییه‌ خزمه‌تگوزارییه‌كانى ناو كه‌مپه‌كه‌ له‌رِووى ناخۆشى رِێگاوبان و گه‌یاندنى تۆرِى ئاو، جێگه‌ى حه‌وانه‌وه‌ و چۆنیه‌تى پێشوازى كردن له‌په‌نابه‌ران بۆ ناو كه‌مپه‌كه‌ كه‌ بوونه‌ته‌ گرفتى سه‌ره‌كى، هه‌وڵه‌كانمان به‌و ئاراسته‌یه‌ بتوانین باشترین خزمه‌تگوزاری بۆ ئه‌و په‌نابه‌ران دابین بكه‌ین.