داوای جووڵاندنی پێشمەرگە بۆ بەرپەرچدانەوەی ئۆپەراسیۆنی دیجلە دەكرێت
پێكدادان..
لە دوای چوونی هێزەكانی ئۆپەراسیۆنی \"دیجلە\"" بۆ كەركووك و دەوروبەری، نائارامی نەك كەم نەبووەتەوە، بەڵكوو زیاتر بووە. پێشنیوەڕۆی دوێنێ شەڕەتەقەی نێوان پێشمەرگە و هێزێكی پۆلیسی عێراق لە قەزای \""خوورماتوو\"" كوژرانی هاووڵاتییەك و برینداربوونی یازدە كەسی لە هەردوو لا لێ كەوتبووەوە.
(مەلاكەریم شكوور) كە جێگری مەڵبەندی پازدەی یەكێتییە لە ناوچەكە، هۆكاری ڕووداوەكە بۆ \""ئیستیفزازكردن\"" بە پێشمەرگە دەگەڕێنێتەوە لە لایەن هێزەكەی عێراقەوە.
ئەم پێكدادانە، دوابەدوای بڵاوكردنەوەی بەیاننامەیەكی نووسینگەكەی (نووری مالیكی) هات كە تێیدا گوتبووی: با پێشمەرگە لە \""دیجلە\"" دوور بكەوێتەوە و هیچ كارێك نەكات كە ناسەقامگیری دروست دەكات. بەڵام گوتەبێژی وەزارەتی پێشمەرگە، پێكدادانەكەی نێوان پێشمەرگە و هێزكەی \""دیجلە\"" بە كێشەیەكی \""شەخسی\"" ناو دەهێنێت.
وەزارەت وەڵام ناداتەوە
وەزارەتی پێشمەرگەی هەرێم لە ڕێگەی گوتەبێژەكەیەوە ڕایگەدەگەیەنێت كە بڕیاریان داوە چیی دیكە لەسەر مەسەلەی ئۆپەراسیۆنی \""دیجلە\"" قسە نەكەن و بۆچوونەكانیان هەر ڕوونكردنەوە و لێدوانەكانی پێشترە.
(جەبار یاوەر) دەڵێت: \""چیی دیكە لەسەر ئەو مەسەلەیە قسە ناكەین و هەر ڕوونكردنەوە و بەیاننامەكانی پێشترە. نامانەوێت بگەینە ئەوەی (مالیكی) هەر قسە بكات و ئێمەیش وەڵامی بدەینەوە.\""
پێشتریش گوتەبێژەكەی وەزارەتی پێشمەرگە هەر نۆ ئۆپەراسیۆنەكەی عێراقی بە نادەستووری زانیبوو كە لە ڕێگەی پەرلەمانەوە پێك نەهێنراون؛ هاوكات جەختی كردبووەوە كە دەبێ هەر كردەیەكی سەربازی لە ناوچە كێشەلەسەرەكان بە هەماهەنگیی پێشمەرگە و سوپای عێراق بێت.
سیخوڕیكردن
ئاشكرابوونی بەڵگەنامەیەكی نهێنی لە مێدیاكاندا، كە ژمارە 800ـی لەسەرە و هیی 30/10/2012ـیە، دەریدەخات كە فەرماندەی ئۆپەراسیۆنی دیجلە (عەبدولئەمیر ئەلزەیدی) داوای لە یەكە سەربازییەكانی فیرقەی دوازدەی سوپای عێراق كردووە زانیاری لەسەر حزبە كوردییەكانی سنووری كەركووك كۆ بكەنەوە.
هەروەها داوا كراوە زانیاری لە بارەی دروشم و لافیتەی حزبەكان و گوتەكانی سەرۆكی هەرێمەوە كۆ بكرێنەوە و سنووریان بۆ دابنرێت، چونكە كاریگەرییان لەسەر ئاییندەی كەركووك و پێكەوەژیانی نەتەوەكان دەبێت.
تۆماركردنی سكاڵا
یەكێك لەو هەنگاوانەی كە هەفتەی داهاتوو ئەنجوومەنی پارێزگای كەركووك دەینێت، تۆماركردنی سكاڵایە لە دادگەی ئیتیحادی لەسەر بوونی ئۆپەراسیۆنی دیجلە لە ناوچەكەدا بە شێوەیەكی نایاسایی.
پەرلەمانتارێكی بزووتنەوەی گۆڕان لە پەرلەمانی عێراق، هەمان پێشنیازی بۆ ئەنجوومەنە كردووە كە بە پێی ماددەی 93ـی دەستوور ئەو سكاڵایە تۆمار بكەن. ڕەنگە گرنگترین خاڵی پێشنیازە حەوتخاڵییەكەی (لەتیف شێخ مستەفا)، ئەوە بێت كە داوای كردووە هێزی پێشمەرگە بە وریاییەوە بەرەو كەركووك و ناوچە كێشەدارەكان بجووڵێنرێت؛ بێ ئەوەی شەڕ و پێكدادان ڕوو بدات.
خاڵەكانی دیكەیش ئەمانەن: (تاڵەبانی) داوا لە (مالیكی) بكات ئۆپەراسیۆنەكان هەڵبوەشێنتەوە و داوا لە سەرۆكی داداگەی ئیتیحادییش بكات بێلایەن بێت. وڵاتان لە نایاساییبوونی \""دیجلە\"" ئاگادار بكرێنەوە. كوتلە كوردییەكان واژۆ كۆ بكەنەوە و (مالیكی) بانگهێشتی پەرلەمان بكەن. ناڕەزایەتیی جەماوەری لە هەرێم و ناوچە جێناكۆكەكان كۆ بكرێتەوە. هەماهەنگی لە نێوان هەرێم و نوێنەرانی كورد لە بەغدا هەبێت.
پێشێلكاری و جموجۆڵەكانی ئۆپەراسیۆنی دیجلە:
_ پێكهێنانی \""دیجلە\"" دژ بە ماددەی 61ـی یاسای عێراقی فیدراڵە و بە بێ بڕیاری پەرلەمان پێك هێنراوە. ئۆپەراسیۆنەكە لە فیرقەكانی 5 و 12ـی سوپای عێراق پێك هاتووە.
_ بە ناوی پشتگیریكردن لە پڕۆژە خزمەتگوزارییەكانەوە كۆنگرەی ڕۆژنامەوانیی بەستووە و هێزی خۆی بۆ ترساندنی خەڵكی ئەو ناوچانە دەرخستووە.
_ سەرقاڵی دانانی بازگەی پشكنینن لە دەوروبەری كەركووك و ناوچەكانی دیكە تا دەستەڵاتی ئیدارەی كەركووك و دەوروبەری سنووردار بكەن.
_ ڕێگریكردن لە بارهەڵگری بازرگانانی كورد لە سنووری خانەقین و مەرزی پەروێزخان.
_ بەرنامە دادەنێن تا بە \""كارت\"" ڕێگە بە هاووڵاتیانی هەرێم بدەن بچنە كەركووكەوە.
_ سیخوڕی بەسەر بارەگای حزبە كوردییەكانی كەركووكەوە بكەن و سنوورێك بۆ چالاكییەكانیان دابنێن.
_ ئامانجی ئۆپەراسیۆنەكە لێسەندنەوەی هەموو دەستەڵاتێكی ئەمنییە لە پارێزگار و ئەنجوومەنی پارێزگای كەركووك و وەلانانی ئاساییش و پۆلیسی كورد لە ناوچەكەدا.
_ ئامانجی داهاتوویان هاتنەناو پارێزگای كەركووك و كۆنتڕۆڵكردنی هەموو گەڕەك و شوێنێكە.
_ كۆكردنەوەی كۆدەنگی لە دژی كورد و بەكارهێنانی ئەو لایەن و خەڵكانەی كە بە ئاشكرا دژایەتیی كورد دەكەن.
_ لە ڕێگەی هێنانی تۆپ و كەلوپەلی سەربازیی جۆراوجۆرەوە، ترس لای هاووڵاتیانی كورد لە ناوچە جێناكۆكەكان دروست دەكەن.
_ وەزارەتی ناوخۆی عێراق سەرقاڵی پێكهێنانی لیژنەیەكە بە سەرۆكایەتیی (عامر خزەیر عەباس)ـی گەورە ئەفسەر، تا لێكۆڵینەوە لە هەڵسوكەوتنی ئەفسەرانی كورد دژ بە ئۆپەراسیۆنی \""دیجلە\"" بكرێت.
_ داوا لە (مالیكی) كراوە ئۆپەراسیۆنێك بە ناوی \""شیمال\"" لە هەولێر پێك بهێنرێت؛ بەو بیانووەی پێشمەرگە ناتوانێت بەرپەرچی هێرشەكانی توركیا بداتەوە.
_ (مالیكی) لە بەیاننامەیەكی هۆشیاركەرەوەدا داوای لە پێشمەرگە كردووە پێویستە هیچ كارێك نەكەن بەرانبەر ئۆپەراسیۆنەكە كە گرژی و ناسەقامگیری لە ناوچەكەدا دروست دەكات. "
