لە ساڵیادی كۆچی دوایی كاكە (جەوهەر نامیق)ـی هەڤاڵی خەباتمان و یەكەمین سەرۆكی پەرلەمانی هەرێمی كوردستاندا، یادی خەبات و خۆڕاگریی میللەتی چەوساوە و غەدرلێكراومان دەكەینەوە.

ئەو میللەتەی (كاكە جەوهەر) زۆر جوامێرانە لەگەڵ هەموواندا بۆی تێكۆشا. ئەو هەمیشە باسی ئەوەی دەكرد كە ئەو كاتەی لە بەغدا قوتابی بوو، چووە ڕیزی یەكیەتیی قوتابیانی كوردستان و دواتر پارتیی دیموكراتی كوردستانەوە، بە تەواوی هەستی كرد كە ئەدرێسی ڕاستی خەباتی دۆزیوەتەوە، چووەتە قوتابخانەی ژیانی سەربەرزانە و بووەتە قوتابیی قوتابخانەی بزووتنەوەی ڕزگاریخوازی كوردستان، كە لە ڕێبازی (بارزانی)ـدا بەرجەستە بوو، هەر لە سەرەتایشەوە زانیویەتی ڕێگەیەكی زەحمەت و درێژە، بەڵام پڕە لە سەربەرزی و شەرەفمەندی، هەر بۆیە وەكوو دەیگوت لەگەڵ خۆمدا سۆز و پەیمانم بەست تاوەكوو هێزم تێدا مابێت و تەمەنم بوار بدات، بەو ڕێگەیەدا بچم تا بگەیەنە دوائاواتی میللەتەكەمان، ئەو خۆی بە سەرفراز دەزانی كە لە ڕاپەڕین و ئەنجام و دەسكەوتەكانیدا بەشدارییەكی كاریگەری هەبووە.

(كاكە جەوهەر) حەقی بوو، چونكە لە سەرەتای حەفتاكانەوە تاوەكوو ئەم دواییە نەحەسایەوە، لە بەغدا لە تەك هەڤاڵانیدا خەباتی نهێنیی ڕێكخستنی بە ڕێوە دەبرد، دواجار لە ساڵی 1972ـدا چووە بنكەكانی شۆڕشی ئەیلوول و چووە ژێر باری ئەركی ڕێكخستن و پێشمەرگایەتی.

دوای نسكۆی ساڵی 1975 لەو گەنجە ئەمەكدارانە بوو كە لەسەر ڕێنماییەكانی (بارزانیی نەمر) و سەركردایەتیی تازەی دوای نسكۆ، لەگەڵ كۆمەڵێك هەڤاڵی دیكە دوای یەك مانگ لە نسكۆ كەوتنە كۆبوونەوە بۆ ڕێكخستنەوەی پارتیی دیموكرات و شۆڕش و ئەویش زۆر بە نهێنی و لە بارودۆخێكی سەخت و ئاڵۆزی ژێرباری ڕێككەوتننامەی (سەددام حوسێن) و شای ئێران، كە بە هیچ شێوەیەك ڕێگەیان بە خەباتی سیاسی و حزبی نەدەدا، نە لە عێراق و نە لەناو پەنابەرانیش لە ئێراندا، ئەو لە تەك هەڤاڵانیدا لە نیوەشەوی تاریكی ئەو سەردەمەدا هەر لە ساڵی 1975ـدا گشت سنوورە سوورەكانی بەزاند و خۆی گەیاندە پەناگەی بنەماڵەیەكی كوردی دڵسۆزی نەتەوەیی لە كوردستانی توركیا دوای چەند مانگێك خۆی و هەڤاڵانی توانییان ڕێگە بكەنەوە بۆ ناو كوردستانی عێراق و دەست پێ بكەنەوە و شەڕی پارتیزانی بكەن.

ئەو هەڤاڵانەی ساڵی 1976 لەگەڵ ئەودا بوون لە ئەشكەوت بۆ ئەشكەوتی دەڤەری بادینان دەگەڕان. دەگێڕنەوە كە ئەو جگە لە كاروباری ڕۆژانەی سەركردایەتی و وەڵامدانەوەی نامەی هەڤاڵانی ڕێكخستنە نهێنییەكانی ناوخۆی وڵات و ڕێكخستنی كاروباری پێشمەرگە، بە جیددیش خەریكی كاروباری ڕاگەیاندن بوو، ئەو لە بناری چیا سەركەشەكاندا خۆی بابەتەكانی ڕۆژنامەی خەباتی چاپ دەكرد و بە دەستگای ڕنیۆی كۆن ڕایدەكێشان، هەرخۆی بەیاننامەكانی سەركردایەتیی كاتیی چاپ دەكردن و سەرپەرشتیی ڕادیۆی دەنگی كوردستانی دەكرد كە لە ساڵی 1987ـدا بە زەحمەتێكی زۆر لە ڕێگەی كوردانی دڵسۆزەوە بە نهێنی لە سووریا و توركیاوە گەیاندرایە بنكەكانی پێشمەرگە، ساڵ و نیوێك بە تەنیا ئەو كارەیشی دەكرد تاوەكوو دوای ماوەیەك هێدی هێدی هەڤاڵانی دیكە پێڕاگەیشتن و بوون بە هاوكاری لەو ڕێگە سەختەدا، ئیتر هێدی هێدی بە توانایەكی ماددی و لۆجستیكی زۆر كەمەوە، بەڵام بە ئیرادەیەكی زۆرەوە پێگەی كاری حزبی و پێشمەرگایەتییان بە هاوكاری لەگەڵ هەڤاڵانی لە ناوچەیەكی ڕزگاركراوی ئەوكاتەدا دامەزراند.

ئەو و هەڤاڵانی و سەركردایەتی لە ڕۆژانێكی بەهاری ئاوادا، بانگی شۆڕشی گۆڵانیان دا و دواجار پاش ڕاپەڕین هەر لە ڕۆژانی وەهادا دروست لە مانگی ئایار هەڵبژاردنی یەكەم پەرلەمانی كوردستانیان بە ئەنجام گەیاند، (كاك جەوهەر) بە چاوی خۆی خەباتی گەلەكەی لە ڕۆژە سەختەكاندا بینی و بەشداریی تێدا كردووە، بۆیە زۆر بە گرنگییەوە دەیڕوانییە دیاریكردن و هەڵبژاردنی خۆی بە یەكەم سەرۆكی پەرلەمانی كوردستان. ئەو لە پەرلەمانی كوردستاندا، بەشدارییەكی دیاری كرد لە دروستكردنی ژیانی پەرلەمانی و دیموكراسی لە هەرێمی كوردستاندا، بە جیدییەت و بە شەوقەوە كەوتە كار هەروەك سەردەمی خەباتی نهێنیی ناوشار و پێشمەرگایەتی بە دڵسۆزییەوە لە كارەكانیدا دەچووە پێش، جیددییەت و لەخۆبوردوویی و دەستپێشخەری، بە خەسڵەتی بەرچاوی ئەو مانەوە، هەر بەو ڕۆحییەتەیش دوای ڕاپەڕینی ساڵی 1991 فەرمانی سەركردایەتیی پارتیی بە جێ هێنا و چووە گەرمیان بۆ دامەزراندنەوەی ڕێكخستنەكانی جەماوەری پارتی و هەروەها ئەو شەرەفەی پێ درا كە ببێتە بەرپرسی ئەو میحوەرە لە بەرەی كوردستانیدا، هەر بەو گەشبینییەیشەوە بەشداریی پڕۆسەی ئاشتبوونەوەی گشتی كرد لە ساڵی 1998ـدا و چەندین مانگ سەرۆكی شاندی پارتی بوو بۆ كۆبوونەوەكانی ئاشتی و ئاشتبوونەوە و لە هاتوچۆی بەردەوامدا بوو لە نێوان هەولێر و سلێمانیدا، پێش ئەوەیش لە پەرلەمانی كوردستاندا، نموونەیەكی جوانی لە خەباتی مەدەنی پێشان دا لە پێناو ئاشتیدا كە 103ڕۆژ خۆی و چەند ئەندامێكی پەرلەمان پەناگیریان بۆ ئاشتی كرد، ئەو خەباتە هەمەلایەنە كە یەكێتیی نیشتمانیی كوردستان و پارتیی دیموكراتی كوردستان و ئاشتیخوازانی كوردستان بەڕێوەیان دەبرد، لە ئەنجامدا هاتە بەر و ئاشتی و ئاساییش گەڕایەوە كوردستان تاوەكوو كار گەییشتە گەڕانەوەی هەموو فڕاكسیۆنەكان بۆ پەرلەمان، دواتریش پێكهێنانی حكوومەتی یەكگرتووی كوردستان كە ئەمڕۆ بەرهەمە زێڕینەكەی لە بەرچاومانە.

لەم یادەدا هەموو ئەو نیشتمانپەروەر و دڵسۆزانەیش وەبیر دێنینەوە كە بە دڵ و بە گیان بەشداریی سەرخستنی ئاشتی و ئاشتبوونەوەی گشتییان كرد لە كوردستاندا، لە پێش هەموویشیانەوە كەسایەتیی ئاشتیخوازە مەزنەكانی كوردستان و سەركردایەتیی یەكێتیی نیشتمانیی كوردستان و پارتی و جەماوەری گەل كە بە پەرۆشەوە پشتیوانی پڕۆسەی ئاشتبوونەوە بوون، هەروەها دۆستانی كورد لە ئەورووپا و ویلایەتە یەكگرتووەكانی ئەمەریكا.

ژیان و خەباتی كەسانی خەباتگێڕی وەك (كاكە جەوهەر) لە ژیان و خەباتی گشت گەل جیا ناكرێتەوە. (جەوهەر نامیق) هەر لە تەمەنی گەنجییەوە بە دەستی پارتی و ڕێبازی (بارزانی) پەروەردە بووە، بێگومان پارتی و هەموو حزبەكانی دیكە هەمیشە سەربەرزن كە ڕۆڵەی هۆشمەندی بەم جۆرە بە گەل و نیشتمان دەبەخشن. ئەوانە نەك تەنیا سومبولی پارتین، بەڵكوو جێگەی سەربەرزیی هەموو خەباتگێڕانی ڕێگەی ڕزگاریخواز و ئازادیخوازن لە كوردستان، لە هەر حزبێك بن یان سەر بە هەر بیر و باوەڕێكی سیاسی بن.

ڕێزگرتن لە خەباتی تێكۆشەران، شانازیكردن بە سیمبول و سەركردەی نەتەوەیی و نیشتمانپەروەرەكان، سیفەتێكی گشتیی هەموو گەلانی جیهانە، گەلی كوردستانیش ڕێز لە سەركردە و سیمبولەكانی دەگرێت و بە هیچ شێوەیەك قبووڵ ناكات كەس سوكایەتی بە سیمبولەكانی بكات، چونكە هەموو كەسێكی تێگەییشتووی گەلەكەمان دەزانێت كە ئازادیی ئەمڕۆ بەرهەمی خەباتی ئەوانە، دەوڵەمەندیی مێژووی ئێمە بەرهەمی پێشڕەویی ئەوانە بۆ خەباتی گەلەكەمان لە پێناوی ئازادی و سەربەرزیدا، نەوەیەك بۆ ئەوەی باوەڕی بە خۆی و داهاتووی خۆی هەبێت، دەبێت ڕێگە نەدرێت مێژوو و ڕابردووی سەركردەكانی پشێوێنرێت.

نەتەوەی كورد لە مێژووی پڕ لە قوربانی و سەروەریی خۆیدا، خاوەنی خەباتگێڕ و سەركردە و سیمبولی زۆر گەورەیە ئەمڕۆ، هەروەها لە داهاتوویش دەبێت ڕێز لە یاد و بەها بەرزەكانی هەموو ئەو خەباتگێڕانە بگرین، هەمیشە بیانكەینە هێماكانی یەكخستنی نەتەوەییمان و گەلی كوردستان بە گشتی یادەكانیان وەكوو بۆنە نەتەوەییەكان و هاوشێوەی نەورۆز بكەینە خاڵی یەكخستنی نەتەوەكەمان ئەوەیش ڕێگەی ڕاست و دروستە بۆ سەرفرازیی هەمیشەیی گەلەكەمان، ئەوانەی هەوڵ دەدەن خەباتی شۆڕشگێرانەی حزبەكان و پێشمەرگە بێنرخ پێشان بدەن، هەوڵ دەدەن خەباتی سەركردە مێژووییەكانمان و سیمبولە نیشتمانییەكانمان بشێوێنن، دەبێت باش بزانن بەو كارەیان گەورەترین زەربە لە متمانەبەخۆبوونی كورد دەدەن هەروەها زەربە لە ئاییندەی كوردستان دەدەن. ئەو سیمبولانە نیشانەی دەوڵەمەندیی مێژووی ئێمەن و مایەی دڵنیایی و ئۆقرەین بۆ گەل، مەعقول نییە لە كوردستانی ئازاددا، ڕێگە بدرێت سوكایەتییان پێ بكرێت.

لە وڵاتانی جیهاندا بە پێی یاسا ڕێگە نادرێت سوكایەتی بە مێژوو و خەباتی گەل و سەركردە مێژووییەكانیان بكرێت، گەلانی جیهان ئەوە بە تێكدانی مۆڕاڵی نەتەوەیی خۆیان تەماشا دەكەن و قبووڵی ناكەن، كوردیش ئەوە قبووڵ ناكات. هەروەها نابێت ئەو كارە خراپە لەنێو گەلەكەماندا بچێنرێت، كوردستان خاوەنی مێژوویەكی دەوڵەمەندە لە گواستنەوەی ژیان لە ئەشكەوتەوە بۆ یەكەمین گوند لە جیهان لە دەستپێكردنی یەكەم پڕۆسەی چاندن و كشتوكاڵیدا لە بەرخودان بەرانبەر بە گەورەترین و دڕندانەترین ڕژێمی سەردەم و چەكە كۆكۆژییەكانیان.

ئەوانە جێگەی شانازین، واتا مێژوو و ژیانمان بەو شێوە تاریك و ناپەسەند نییە، كە هەندێك كەس هەمیشە هەوڵ دەدەن بەم شێوەیە نیشانی بدەن و هەوڵ دەدەن منداڵان و گەنجانی ئێمە چەواشە بكەن و پێیان بڵێن مێژووی كورد و سەركردەكانی كورد خاڵی گەشیان تێدا نییە، ئەوانە بزانن یان نەزانن بەو هەوڵانەیان ئاو لە ئاشی ناحەزانی كورد دەكەن و یادەوەریی نەوەی ئێستا ڕەش دەكەنەوە و بڕوابوون بە دواڕۆژ لای نەوەی ئێستامان دەكوژن و ناهێڵن لایەنە كەش و بەرز و ئافەرینەكانیان ببینرێت، هەر حزب و كۆمەڵەیەكی تێكۆشەری ئەم نیشتمانە بەشی خۆی سیمبول و نموونەی گەشی جوانی هەیە، هەر توێژێكی كۆمەڵگەكەمان پڕە لەم هێما و سیمبولە بەرزانە، ئەوانە دەبێت هەموویان مایەی سەرفرازی و بڕوابەخۆبوونی ئێمە بن لە بەردەم هەموو دونیادا.

ناكرێت سوكایەتییان پێبكرێت، میللەتانی دونیا هەوڵ دەدەن تاكە قارەمانێكی مێژووی سیمبولی گەش لە مێژووی خۆیاندا بدۆزنەوە تاوەكوو بەرەوڕووی دونیا ببنەوە و شانازیی پێوە بكەن. میللەتانی جیهان تاشەبەردێكی كۆنیش بدۆزنەوە كە هێمای ڕابردووی گەشتی خۆیانی پێوە بێت، بە دڵ دەیپارێزن و بۆ هەموو دونیا نماییشی دەكەن.

ڕەخنە شتێكی گونجاوە، بەڵام بە زانستی و واقیعیانە نەك بۆ تێكشكاندن و هەڵوەشاندنەوەی هەست و نەستی كورد. ساڵیادی (كاكە جەوهەر) پەند و وانەی زیاترمان دەخاتە بیر. نهێنیی سەروەرییەكانی ئەو لە خەسلەتە مرۆڤدۆستییەكانی بوو كە ئینسانێكی خۆنەویست بوو. ڕاست گۆ و دەستپاك و كراوە بوو، ئەو لە پاییزی 1975 بە گۆپاڵێك لە دیوی ئێرانەوە چووە باكوور و ساڵی 1979 بە گۆپاڵێك لە بنكەكانی پێشمەرگە گەڕایەوە بۆ كۆنگرەی نۆیەمی پارتیی دیموكراتی كوردستان.

لە دەرەوەیش بە ڕەنجی خۆی ژیا و لە هاوسەنگەرانی دانەبڕا، بە چەكێكی سادە بە قەمسڵە و جل و بەرگی خاكییەوە بەشداریی چالاكانەی لە سەركەوتنی ڕاپەڕینی ساڵی 1991ـی خەڵكی كوردستاندا كرد، ئەو بەو ژیانە سادەیە، بەڵام دەوڵەمەند بە خەبات كەسایەتی و پێگەی شایەنی خۆی ئەوەی خوڵقاند، ئەو شادوومان بوو بەوەی گیانی مەعنەوی لەگەڵ خەبات و خۆڕاگریدا بە دەست هێنا، مردن چارەنووسی هەموو ئینسانێكە زوو یان درەنگ ماڵئاوای لەم دونیایە دەكەین، بەڵام گرنگ ئەوەیە بەهایەكی جوان بخەینە سەر خەرمان و فەرهەنگ و مێژووی گەلەكەمان.

گرنگیی ژیان لەوەدایە تاوەكوو پێمان دەكرێت كاری باش و هێمای سیمبولیانەی گەشی جوان بە جێ بهێڵین. نیشتمانەكەمان بەپیت و جوانە، ئەگەر باشتر خزمەتی بكەین، زیاتر بە ڕووماندا دەگەشێتەوە، خاك وەك بڵێی گیاندارە هەرچەند زیاتر خزمەتی بكەی، ئەوەندە زیاتر خۆشگوزەرانی و كامەرانیت پێ دەبەخشێت. میللەتەكەمان بەسۆز و بەوەفا و لەخۆبووردەیە و شایانی ئەوەیە هەمیشە ملكەچی بین و خزمەتی بكەین. ئێستا ئەو كاتەیە كە ئەو میللەتە بە بەختەوەری و ئاسوودەیی زیاتر ژیان بەسەر دەبات و پەند و وانەی ژیان و خەبات و ژیانی وەك (كاك جەوهەر) و ئەوانەی وەك (كاك جەوهەر) ئەوەمان پێ دەڵێن، ئەمڕۆ لێرەدا دووبارە شەریكی خەم و پەژارەی خێزان و كەسوكاری و هەڤاڵانی (كاكە جەوهەر)ـین ئەوەندە دەڵێین كە هەرچی بكەین ناتوانین حەقی خۆبەخشین و فیداكاریی كەسانی سەربەرزی ئەم وڵاتە بدەینەوە كە لە پێناو ئازادی و خۆشگوزەرانی و ڕزگاریی میللەتی كورددا خەباتیان كردووە. بەوپەڕی شانازییەوە یادی هەڤاڵ و هاوكار و برای نەمرمان (كاك جەوهەر) دەكەینەوە.