بێجگە لە ئەمەریكا، كە بە فەرمی و وەك سەرۆكی هەرێمی كوردستان پێشوازی دەكرێت، مەسعوود بارزانی، لە بەرنامەیدایە بۆ هەندێك لە وڵاتانی ئەورووپایش بچێت.

گوتەبێژی سەرۆكایەتیی هەرێمی كوردستان، د. ئومێد سەباح، ئەگەرچی ڕۆژی گەشتەكەی سەرۆكی هەرێمی دیاریی نەكرد، بەڵام بە ئاژانسی هەواڵی پەیامنێری گوت كە لە چەند ڕۆژی داهاتوودا و بە یاوەریی شاندێكی فەرمیی هەرێم گەشتەكەی ئەنجام دەدات.

د. ئومێد سەباح، گوتی كە ئەو گەشتەی سەرۆك بارزانی تەنیا بۆ وڵاتە یەكگرتووەكانی ئەمەریكا نییە، بەڵكە بۆ چەند وڵاتێكی ئەورووپایش دەچێت و لە كاتی خۆیشیدا بەرنامەی گەشتەكەی ئاشكرا دەكرێت.

هەرچەند وەها بڵاو ببووەوە كە بەر لە گەشتەكەی بۆ ئەمەریكا و ئەورووپا سەرۆكی هەرێم لەگەڵ سەرۆكی حزبە كوردییەكاندا كۆ ببێتەوە، بەڵام گوتەبێژەكەی سەرۆكایەتیی بێئاگایی خۆی لەم بارەوە نیشان دا.

پێشتریش بڵاو ببووەوە كە بە هۆی گەشتەكەی بۆ ئەمەریكا و ئەورووپا، سەرۆكی هەرێمی كوردستان لە كۆنگرەی لووتكەی عەرەبیدا كە وەها بڕیارە 29ـی ئەم مانگە لە بەغدا ببەسترێت، بەشدار نابێت.