سه‌عات 10ی سه‌رله‌به‌یانیی ئه‌مڕۆ 26/1/2012 لێژنه‌ی په‌یوه‌ندییه‌كان‌و ڕۆشنبیری‌و ڕاگه‌یاندن‌و شوێنه‌واره‌كان له‌په‌رله‌مانی كوردستان به‌ئاماده‌بوونی د.كاوه‌ مه‌حمود وه‌زیری رۆشنبیری‌و لاوانی حكومه‌تی هه‌رێمی كوردستان‌و تارق جامباز ئه‌ندامی پێشووی په‌رله‌مانی كوردستان‌و شاره‌زا له‌و بواره‌، له‌گه‌ڵ د.سه‌عد به‌شیر ئه‌سكه‌نده‌ر به‌ڕێوه‌به‌ری گشتیی خانه‌ی كتێب‌و دیكۆمێنتی نیشتمانی له‌به‌غدا‌و د.عماد عه‌بدولسه‌لام مامۆستای كۆلێجی ئاداب به‌شی مێژوو له‌زانكۆی سه‌ڵاحه‌دین‌و ره‌فیق ساڵح سه‌رۆكی بنكه‌ی ژین له‌سلێمانی كۆبۆوه‌.

مه‌به‌ست له‌كۆبوونه‌وه‌كه‌ كه‌به‌ئاماده‌بوونی سه‌رۆك‌و جێگر‌و بڕیارده‌ر‌و ژماره‌یه‌ك له‌ئه‌ندامانی لیژنه‌كه‌ به‌ڕێوه‌چوو، بۆ تاوتوێكردن‌و گوێگرتن بوو له‌سه‌رنج‌و تێبینییه‌كانی ئاماده‌بووان له‌سه‌ر پڕۆژه‌ یاسای دیكۆمێنتپارێزی له‌هه‌رێمی كوردستان-عێراق كه‌ئێستا له‌به‌رده‌م لیژنه‌كه‌یه‌ بۆ تاوتوێكردنی بڕگه‌و ماده‌كان له‌پێناو ده‌وڵه‌مه‌ندكردنی زیاتری پڕۆژه‌كه‌‌و دواجار نووسینی راپۆرتی كۆتایی لیژنه‌كه‌ له‌سه‌ری‌و له‌لایه‌ن ئاماده‌بووانه‌وه‌ چه‌ندین راو سه‌رنج‌و پێشنیازی پێویست خرانه‌ڕِوو.