سەرۆکی دیوانی سەرۆکایەتی ھەرێم رایگەیاند سەرۆکایەتی ھەرێمی کوردستان پێشوازی لە بڕیاری ئەنجوومەنی وەزیرانی عێراق دەکات تایبەت بە ھەڵوەشاندنەوەی بڕیارەکانی ئەنجوومەنی سەرکردایەتی شۆڕشی ھەڵوەشاوە و سەرجەم بڕیارەکانی لێژنەی کاروباری ھەڵوەشاوەی باکوور کە لە کەرکوک دەرچووە, لەگەڵ تەئکید کردنەوە لەسەر دەرکردنی بڕیاری لەم جۆرە لە ئاییندەدا .
فوئاد حوسێن سەرۆکی دیوانی سەرۆکایەتی ھەرێمی کوردستان ئەمڕۆ چوارشەممە لە لێدوانێکی رۆژنامەوانیدا کە کۆپیەکی دەست ئاژانسی ھەواڵی پەیامنێر گەیشتووە, رایگەیاند: سەرۆکایەتی ھەرێمی کوردستان پێشوازی لە بڕیاری ئەنجوومەنی وەزیرانی عێراقی فیدراڵ دەکات کە لە رۆژی ٢٤/١/٢٠١٢ دەرچووە تایبەت بە ھەڵوەشاندنەوەی بڕیارەکانی ئەنجوومەنی سەرکردایەتی شۆڕشی ھەڵوەشاوە و چارەسەرکردنی ئاسەواری ھەڵوەشاندنەوەی ئەم بڕیارانە بە پێی راسپاردەکانی لێژنەی مادەی ١٤٠ دەستووری , ھەروەھا ھەڵوەشاندنەوەی سەرجەم بڕیارەکانی لێژنەی کاروباری ھەڵوەشاوەی باکوور کە لەکەرکوک دەرچووبوو و کار بە راسپاردەی لێژنەی جێبەجێکردنی مادەی ١٤٠ بکرێت.
فوئاد حوسێن گوتیشی: سەرۆکایەتی ھەرێم بەبەرزی ئەم ھەنگاوە ھەڵدەسەنگێنێ , لەھەمانکاتیش بەپێویستی دەزانی ھەنگاوی ئیجابی دیکەی زیاتر بنرێت بەم ئاڕاستەیە.
ھەروەھا ئاماژەشیدا: ھەنگاونان بە ئاڕاستەی دەرکردنی ئەم جۆرە بڕیارانە سەرخستنی حەقە و ھەنگاوێکی گەورەیە بەرەو نەھێشتنی ئاسەوار و پاشماوەی رژێمی پێشوو و گەڕاندنەوەی مافی ھەموو ئەو کەسانەی بەم بڕیارانە زەرەر مەندبووینە.