(محه‌ممه‌د ئیحسان ) رایگه‌یاند که‌ پێکهێنانی هه‌رێمی‌تر له‌ عێراقدا کاریگه‌ریی به‌سه‌ر چۆنیه‌تیی جێبه‌جێکردنی مادی 140 وه‌ نابێت، به‌تایبه‌ت ئه‌وه‌یکه‌ ئه‌نجومه‌نی پارێزگای دیاله‌ رایگه‌یاند. زیاتر روونی کرده‌وه‌ و گوتی که‌ بابه‌تی پێکهێنانی هه‌رێمه‌کان هیچ گرفت و کۆسپێک نانێته‌وه‌. چونکه‌ ده‌ستوور به‌ڕوونی ئه‌م بابه‌ته‌ی تێدا جێگیر کراوه‌ و هاوکات یاسای پارێزگاکان و هه‌رێمه‌کان ئه‌مه‌یان تێدا روون کراوه‌ته‌وه‌. به‌ڵام هه‌ر پارێزگایه‌ک له‌ پێوه‌ستی به‌ ناوچه‌ ناکۆکی‌ له‌سه‌ره‌کان بێت له‌سه‌ری پێویسته‌ که‌ به‌ر له‌ پێکهێنانی هه‌ریم کێشه‌ی زه‌ویی کێشه‌داری چاره‌ بکات.



ئه‌و‌ وه‌ک نموونه‌ خانه‌قین و مه‌نده‌لی که‌ ناوچه‌ی دانه‌بڕاوی کوردستانن خسته‌ به‌رباس و و گوتی که‌ ئه‌گه‌ر هاتوو ناکۆکی له‌باره‌وه‌ دروست ببێت ئه‌وا رێگایه‌کی‌تر هه‌یه‌ که‌ هاووڵاتیان ده‌توانن په‌نای بۆ ببه‌ن، ئه‌ویش راپرسییه‌.


سه‌رۆکی لیژنه‌ی سکرتارییه‌ت له‌ ئه‌نجوومه‌نی باڵای جێبه‌جێکردنی مادده‌ی 140 ی ده‌ستووری عێراقی به‌ر له‌ ‌ده‌ستپێکی کۆبوونه‌وه‌یان له‌ لیژه‌نه‌ی ماده‌ی 140 که‌ له‌ هه‌ولێر به‌رێوه‌چوو به‌ رۆژنامه‌نووسانی راگه‌یاند که‌کۆبوونه‌وه‌ی ئه‌مڕۆیان تایبه‌ته‌ به‌و رێنمایی و رێسایانه‌وه‌ که‌ ماوه‌یه‌ک له‌مه‌وبه‌ر له‌ به‌غداوه‌ ده‌رکراون.


ئیحسان گوتی که‌ ئه‌وان له‌ 2007وه‌ به‌ رێسا و رێنمایی تایبه‌ت به‌ ناوچه‌ جێناکۆکه‌کان له‌ که‌رکووک و شه‌نگال و خانه‌قین و ... کاریان کردووه‌ و ئێستایش به‌ پێویستی ده‌زانن به‌ رێسا و رێنماییه‌کاندا بچنه‌وه‌ تا ناوچه‌ی زیاتر له‌ ناوه‌ڕاست و خوارووی عێراق و هاوکات کوردستانیش بگرێته‌وه‌.


(ئیحسان)ده‌ڵێ که‌ ئه‌و رێسایانه‌ی له‌ لیژنه‌ی باڵاوه‌ له‌ به‌غدا بڕیاریان لێ‌دراوه‌ زۆرترین راگوێزرا و هاورده‌ و دوورخراوه‌کان له‌ ناوچه‌ جێناکۆکه‌کان ده‌گرێته‌وه‌. هاوکات گفتوگۆ له‌ باره‌ی رێکخستنه‌وه‌ی په‌یکه‌ری ئێداری لیژنه‌که‌ ده‌کرێن که‌ مه‌به‌ستی ئاسانکاریی زیاتری هاووڵاتیانه‌.