پەرلەمانتارێكی كورد، بڕیاری داگرتنی ئاڵای كورد لە خانەقین، بۆ ئەوە دەگەڕەنتێتەوە كە (مالیكی) دەیەوێت كورد بە شتی دیكەوە سەرقاڵ بكات، دوای ئەوەی كورد گوشاری زۆری بۆ بەغدا هێناوە.

\"ئاڵا\""ـی عێراقی فیدراڵ، تەنیا لە دوو ماددەی دەستووری عێراقدا باسی لێوە كراوە كە ئەوانیش ڕوون نین. لە بڕگەی دووەمی ماددەی 9ـدا هاتووە: خزمەتی ئاڵا بە یاسا ڕێك دەخرێت. هەروەها لە بڕگەی یەكەمی ماددەی 12ـدا هاتووە: (ئاڵا و دروشم و سروودی نیشتمانی بە یاسا ڕێك دەخرێن بە مەرجێك ئاماژە بە پێكهێنەرەكانی گەلی عێراق بكات.) ئەندامی لیژنەی یاسایی پەرلەمانی عێراق (ئازاد ئەبوبەكر)، پێی وایە كە دەبێ ئاڵای عێراق لە هەموو عێراق و هیی هەرێمیش لە هەرێمی كوردستان هەڵبدرێت، بەڵام ئەوەی كە كێشەی لەسەرە، ناوچە جێناكۆكەكانە.

بەو پێیەی كە كورد دەنگێكی زۆری لەم ناوچانەدا هەیە و هێشتا یەكلا نەبووەتەوە كە ناوچە جێناكۆكەكان بەشێكن لە هەرێم یان نا، بۆیە (ئازاد ئەبوبەكر) پێی وایە كە كوردیش هەقی خۆیەتی ئاڵا لەم ناوچانەدا هەڵبدات وەك چۆن حكوومەتی بەغدا ئەو مافەی هەیە.

بڕیاری داگرتنی ئاڵای كوردستان لە \""خانەقین\""، لە كاتێكدا بوو كە تازە شاندی هەرێم لە بەغداوە گەڕابوونەوە. بۆیە ئەمە گرژییەكی زۆری لە نێوان هەردوو لادا دروست كرد و تا ئێستایش بەردەوامیی هەیە. لە گفتوگۆكانی كورد لەگەڵ بەغدادا، زۆر بە ڕاشكاوی ویستی كورد بۆ یەكلاكردنەوەی كێشەكان بە توندی خرابوویەوە ڕوو. تەنانەت بارودۆخەكە بە ئاڕاستەی توندی لە كۆبوونەوەكەدا ڕۆییشتبوو. (مالیكی) لە پەرچەكرداری هەڵوێستی كورددا، باسی لەوە كردبوو كە ئەوە تەنیا بەغدا نییە كە دەستووری جێبەجێ نەكردووە، بەڵكوو كوردیش پێوەی پابەند نەبووە و ناهێڵن حكوومەتی بەغدا سنوورەكانی هەرێم بپارێزێت كە مەبەستی لە بۆردوومانكردنی (قەندیل) بووە. بە ڕای (ئازاد ئەبوبەكر)، بەو پێیەی كورد پێداگری كرد و ئەزمەی بۆ بەغدا دروست كرد تا داواكان جێبەجێ بكرێن، بۆیە (مالیكی) دەیەوێت لە ڕێگەی بڕیاری داگرتنی ئاڵا و هەندێك شتی دیكەوە كورد سەرقاڵ بكات و كێشەی دیكە زیاد بكات.


-هەولێر"