راوێژكارێكى نوورى مالیكى سەرۆك وەزیرەیلی عێراق ئەمڕۆ شەموو راى گەیاند، لەم هەفتەیەدا شاندى باڵاى هەرێمى كوردستان بەسەرۆكایەتیى بەرهەم ساڵح سەرۆكى حكوومەتی هەرێم سەردانى بەغدا دەكا و لەگەڵ مالیكی كۆ دەبێتەوە.

عادل بەروارى راوێژكاری مالیكى بۆ كاروبارى هەرێمى كوردستان بەئاژانسی كوردستان بۆ دەنگوباس (ئاكانیوز)ی راگەیاند، ئەو سەردانە لە ماوەى ئەم هەفتەیەدا دێتە ئەنجامدان، ئەگەرچی تا ئێستە رۆژ و ئەندامانى شاندەكە دیار نین، بەڵام پێویستە وەزیرى پێشمەرگە، ناوەخۆ و سامانەیلی سروشتی یاوەرى سەرۆكى حكوومەت بكەن، بەو پێیەى كێشەل زیاتر پێوەستن بەو وەزارەتانەوە.

زیاتر گوتى، شاندى هەرێم لەگەڵ نوورى مالیكى سەرۆك وەزیرانی عێراق كۆ دەبێتەوە و هەوڵ بۆ چارەسەركردنى كێشە و ناكۆكییەلی نێوان ناوەند و هەرێم دەدا.

بەروارى ئاماژەى كرد، لە ئێستەدا لە بەغدا دەنگۆى ئەوە هەیە شاندێكى حكوومەتى عێراق سەردانى هەرێمى كوردستان بكا، بۆ كۆبوونەوە لەگەڵ سەرۆكى هەرێم و بەرپرسەیلى هەرێم و چارەسەركردنى ناكۆكییەلی نێوان هەردوولا.

ئەمڕۆ بەرهەم ئەحمەد ساڵح سەرۆكی ئەنجوومەنی وەزیرەیلی هەرێم لە لێدوانێكی رۆژنامەوانیدا رای گەیاند، ئێستە دوا ئامادەسازیی سەردانەكە دەكەین و بۆ ئەو مەبەستە لەگەڵ سەرۆك وەزیرەیلی عێراق لە پێوەندیداین تا بەرنامەرێژییەكی وا بكەین ئەنجامی چاوپێكەوتن و سەردانەكە لە قازانجی سەرجەم عێراقدا بێ و پابەندیی بەدەستوور و جێبەجێكردنی رێككەوتنەیل گرینگیی پێ بدرێ.

ساڵح گوتى، بەلامەوە سەیرە لێدوانەیلی سەرۆكی هەرێمی كوردستان كاردانەوەی ئەوەندە توندی لێ كەوتەوە، لێدوانی سەرۆكی هەرێم زۆر ورد بوو لەوبارەیەوە كە پێویستە رێز لە رێككەوتنەیل و دەستوور بگیرێ، هەروەها جەختی كردووە لەوەی پێویستە هەموو لایەنەیل پابەندیی دەستووری هەمیشەییی عێراق بن.

ماوەی چەند ساڵێكە پرسی نەوت و بودجەی هێزەیلی پێشمەرگە و داهاتی هەرێم لە نەوتی عێراق وەك كێشەی هەڵپەرسێردراو لە نێوان حكوومەتی عێراق و هەرێم بەبێ چارەسەركردن ماونەتەوە .