عەبدولڕەزاق عەلی

سەرۆك بارزانی، بە دوو حەزمە، كۆمەڵێك بڕیاری چاكسازیی و ئیجرائی زۆر گرینگی دەركرد. حەزمەی یەكەمیان، پێوەندیی بە پارتییەوە هەیە كە وەك سەرۆكی پارتی دەریكردووە، ئەوی تریان، پێوەندیی بە حكوومەتەوە هەیە و وەك سەرۆكی هەرێمی كوردستان دەریكردووە.
هەردوو حەزمەكە، پێوەستن بە چاكسازیی و ڕێوشوێنی دارایی و كارگێڕیی یاساییانە و عەدالەتخوازانە لە حكوومەت و حزبدا، لە پێناو هێنانەئارای عەدالەتێكی ڕێژەیی و هەرچی زووتر تێپەڕاندنی ئەم قەیرانە داراییەی تووشی كوردستان هاتووە بە خەڵك و حكوومەتەوە.
پێشخستنی بڕیارەكانی تایبەت بە چاكسازیی لە پارتیدا لە دەرككردنی ئەو ڕاستینەیەوە دێت كە ئەركی پارتییە، وەك خاوەنی مێژووییەكی پرشنگدار لە خەبات و قوربانیدان لە ڕێگەی ڕزگاریی وڵاتدا، وەك گەورەترین حزبی دەسەڵاتدار لە كوردستان، وەك چۆن ڕۆژگاریی سەختی خەباتی ڕزگاریی و پێشمەرگایەتی لە ڕیزی پێشەوەی قوربانیداندا بووە، لە چاكسازیشدا هەروا بێت. ئەركی بەرپرسان و ئۆرگان و ئەندامانێتی، نموونە بن لە هاوكارییكردنی میللەت و حكوومەتی خۆیاندا بۆ تێپەڕاندنی ئەم قەیرانە داراییەی ئەمڕۆ.
دەركردنی بڕیارگەلێك بۆ چاكسازیی لە پارتیدا، بۆ ئەوەی پارتی بە فیعلیی پێشەنگ و بەشداریی یەكەمیی هەوڵەكانی بەدیهاتنی عەدالەتێكی نیسبی و تێپەڕاندنی قەیرانەكە بێت، هەقە بە ئەرێنی لێك بدرێنەوە. كەسانی دلسۆز و وڵاتپارێزیش هەروایان لێك دەدەنەوە.
بەڵام وەك هەمیشە، مەدرەسە كینە لەدڵەكەی نەوشیروان موستەفای حاقید لەسەر هەموو بەشەرییەت، لەمەشیاندا، هەر خێرا هاتنە سەر خەت و دەمدرێژانیان دەڵێن ئەوە نیشانەی گەندەڵیی پارتییە.
گەندەڵی لە پارتیدا هەیە؟ پرسیارێك نییە دووجار بكرێت. بەڵێ. حزبەكانی تر، گەر گەندەڵییان لە پارتی زۆرتر و گەورەتر تێدا نەبێت، كەمتریان نییە. هیچ بەرپرس و ئەندامێكی پارتیش، نەیگوتووە، پارتی، بەرپرسگەلێكی موتەجاویز و گەندەڵی تێدا نییە. كەس ئیدعای نەكردووە، پارتی وەك حزب، عەیارە بیستوچوارە و هیچ خەوشێكی نییە. جەنابی سەرۆك و كاك نێچیرڤانیش، هەرگیز پارتییان لە كەموكورتی و بەعزێك بەرپرسی پارتیان لە تەجاوزات بێبەری نەكردووە، وەلێ گرینگ ئەوەیە، دڵسۆزی و ئازایەتیش لەوەدایە، كاتێك سەركردەیەك بڕیارێك دەردەكات، لە لایەنەكەی خۆیەوە دەست پێ بكات.
پارتی چ دەكات و گۆڕانچییەكان چ دەڵێن، سەلمێنەری بوونی دوو مەدرەسەی زۆر لێكجیاوازن.
پارتی و مەدرەسەی نەوشیروان مستەفا، دوو دنیان بەس خوایان یەكە. پارتی، هێندە باوەڕی بە خۆی و سەرۆك و سەركردایەتی و جەماوەرە دڵسۆزەكەی هەیە، هێندە لە خەمی ئێستێ و داهاتووی نیشیمان و خەڵكەكەیدایە، كە هاتە سەر بڕیاری مێژوویی، لەخۆدەبوورێت و بڕیار دەدات. لەو بڕیارانەدا كە قوربانی و ئازاریان تێدایە، پێش هەموو كەس، خۆی دەبینێت، نەك وەك نەوشیروان، گردێكی سەتان دۆنمی لە نێو جەرگەی شارێكی وەك سلێمانیدا بە كەڵەگایی داگیر كردووە، بە ئیعتیرافی خۆی، دەیان ملیۆن دیناری مۆڵی بێ هیچ حەقوحسابێك وەرگرتووە، ئێستێ بە خەڵكی تر دەڵێت گەندەڵ! بە نێوی گەندەڵییەوە، هەموو ڕۆژێك ئاژاوە و ئاشووب لە سلێمانی دەنێتەوە.
لە غیابی گوماناوی خۆشیدا، جەماعەتەكەی، بە تەنسیق لەگەڵ كۆمەڵەكەی عەلی باپیر و ئێرانچییەكانی تردا، سلێمانییان پەكخستووە و بە ئاشكرا دژایەتی ئیرادەی سەربەخۆییخوازانەی خەڵكی كوردستان دەكەن. هەموو كارێكی نەشیاو ئەنجام دەدەن، تا خەڵك خۆ لەبەر ئەم قەیرانەدا ڕانەگرن، هەوڵی ڕووخاندنی ورەی خەڵكەكە و پێشمەرگە دەدەن. بە شانازیی و خۆنواندنەوە، دەیان هەزار منداڵی كوردستانیان لە خوێندن بێبەش كردووە، لە نائینسانتیترین دیمەندا، نەخۆشیان لە قاوشەكاندا بێچارە هێشتووەتەوە، دادگای ڕەمزی دەوڵەتداری و عەدالەتیان چۆڵ كردووە، هاتوچۆی نێوشار و دەرەوەیان بەرهەڵداوە، پۆلیسی دابینكاری ئەمنییەت و ڕێساویاسایان ناردوونەتەوە ماڵەوە، دەرگای تاوان و دزی و تاڵانیان خستووەتە سەر گازەرەی پشت بۆ تاوانباران و كەمفورسەتان، شار و كوچەوكۆڵانەكانیان بپڕ كردووە لە خۆڵوخاشاك، هەوڵی بەردەوامی داڕمانی دامودەزگەكانی دەوڵەتداری دەدەن، بەمەش ئاو دەكەنە ئاشی ئێران و داعشەوە، كەچی هێندە ڕووقایمن خەڵكی تر تەخوین دەكەن.
جەماعەتی نەوشیروان مستەفا، هەموو ئەم كارەساتانەیان خوڵقاندووە و بە ئومێدی هاتنەوەی فریاڕەسە حاقیدەكەیان لێگەڕاون، كەچی هێشتا باسی نیشتیمانپەروەریی و خزمەتی خەڵك دەكەن! ئاخر ئەگەر نەوشیروان زەڕەیەك ڕێزی لە جەماتەكەی و دەنگدەرانی حزبەكەی بگرتایە، تۆزقاڵێك شعوری بە مەسئوولییەت تێدبووایە بەرانبەر ئەم نیشتیمانە، دەبوا لەم هەموو ڕووداو و نەهامەتییەی بەسەر كوردستاندا هاتووە كە ئەو و حزبەكەی سەبەبكارێكی سەرەكییانن، ئەگەر لە ژووری ئینعاشیشەوە بێت، یەك دوو قسەی بكردایە. ئەڵبەت هەرگیز چاوەڕێی قسەی خێری لێ ناكرێت، بەڵام هەر قسەنەكردنەكەی نیشانەی مەرام و نیازەكەیەتی. نەوشیروان دەیەوێت، جەماعەتەكەی هەموو هەوڵێك و بدەن و سەر لە هیچ خراپەیەك نەكەنەوە، بەڵكو بگاتە مەرامە مێژووییەكەی خۆی. كە نایگاتێ. بە حسێبی خۆی ئەگەر سەری گرت، ئەوە وەك قارەمان بگەڕێتەوە، ئەگەر سەریشی نەگرت و كوردستانی پێ تێكنەچوو، كە بە دڵنیاییەوە سەرناگرێت، ئەوە جەنابیان نەخۆشە و ئاگەداری هیچ یەكێك لە فیعلە جوانەكانی جەماعەتەكەی نەبووە و نییە.
هەندێك برادەری نەوشیروان هەیە قسەنەكردنەكەی دەگێِڕنەوە بۆ هۆكارێكی تر. دەڵێن هی ترسنۆكییەتی. ئەمەی دواییان، قسەی برادەرە پێشمەرگەكانێتی.
خەڵكی كوردستان، كارەساتی زۆریان بەسەرهات، كولەمەرگی و نەداری زۆریان بینی، زاڵمانی زۆریان بەڕێكردن، گەلەك خۆفرۆش و بەكرێگیراویشیان ڕیسوای زەمانە كرد.
ئەمجارەش هەروا دەكەن.