ئه‌مڕۆ پێنج شه‌ممه‌ 5-10-2017 حه‌یده‌ر عەبادی، سه‌رۆكوه‌زیرانی عێراق گه‌یشته‌ كۆشكی ئیلیزێ و له‌ لایه‌ن ئیمانوێل ماكرۆن سه‌رۆكی فه‌ڕه‌نسا پێشوازی لێكراو پاش كه‌مێكی دیكه‌ كۆبوونه‌وه‌ی نێوانیان ده‌ستپێده‌كات و ته‌وه‌ری سه‌ره‌كی گفتوگۆكانیش ریفراندۆمی سه‌ربه‌خۆیی كوردستان و پرسی كڕینی چه‌ك و نه‌وت و ئاوه‌دانكردنه‌وه‌ی ناوچه‌ تازه‌ رزگاركراوه‌كانه‌.

عه‌بادی ئێواره‌ی رۆژی چوارشه‌ممه‌ گەیشتە پاریسی و ئێستا له‌گه‌ڵ ئیمانوێل ماكرۆن له‌ كۆبوونه‌وه‌دان و چاوه‌ڕوان ده‌كرێت پاش كۆتاییهاتنی كۆبوونه‌وه‌كه‌ قسه‌ بۆ میدیاكان بكه‌ن.

په‌یامنیری كوردستان 24 له‌ كۆشكی ئیلیزێوه‌ رایگه‌یاند: "حەیدەر عەبادی سەرۆكوەزیرانی عێراق سەرۆكایەتی شاندێكی حكومەتەكەی ده‌كات و كۆمه‌ڵێك پرسی گرنگ له‌گه‌ڵ به‌رپرسانی فه‌ڕه‌نسا باس ده‌كه‌ن، هه‌ر چه‌نده‌ نووسینگه‌ی سه‌رۆكوه‌زیرانی عێراق ره‌تیده‌كاته‌وه‌ له‌و دیداره‌دا پرسی ریفراندۆمی سه‌ربه‌خۆیی كوردستان باس بكرێت و وه‌زاره‌تی ده‌ره‌وه‌ی فه‌ڕه‌نساش هیچ ئاماژه‌یه‌كی به‌ بوونی باسێكی له‌و شێوه‌یه‌ له‌ ئه‌جێندای گفتوگۆكاندا نه‌كردووه‌، به‌ڵام زانیارییه‌كان ئاماژه‌ی ئه‌وه‌ ده‌ده‌ن كه‌ ریفراندۆمی سه‌ربه‌خۆیی كوردستان گه‌رمترین پرسی عێراق و ناوچه‌كه‌یه‌ و ناكرێت له‌و دیداره‌ خۆیانی لێ ببوێرن و یه‌كێكه‌ له‌ ته‌وه‌ره‌ سه‌ره‌كییه‌كانی دیداره‌كه‌".

هه‌روه‌ها عه‌بادی لەبارەی دۆخی عێراق بەگشتی و پەرەپێدانی په‌یوەندییە ئابوورییەكان و رۆڵی فەرەنسا لە سەرلەنوێ ئاوەدانكردنەوەی ناوچە رزگاركراوەكانیش، گفتوگۆ لەگەڵ ئیمانوێل ماكرۆن سەرۆكی فەرەنسا ده‌كات.

جگه‌ له‌وانه‌ش عه‌بادی له‌گه‌ڵ كۆمپانیای "تالاس" بۆ پڕچه‌ككردن و توتالی بواری نه‌وت و وزه‌ كۆبوونه‌وه‌ ئه‌نجام بدات.






k24