سوپای عێراق رزگارکردنەوەی ناوندی شارۆچکەی حەویجە لە باشووری رۆژئاوای کەرکووک، رادەگەیەنێت، دوای زیاتر لە سێ ساڵ داگیرکردنی لەلایەن رێکخراوی تیرۆریستی داعشەوە.



سەرلەبەیانیی رۆژی پێنجشەممە 5/10/2017، فەریق روکن عەبدولئەمیر یاروڵڵا، فەرماندەی ئۆپەراسیۆنی رزگارکردنەوەی حەویجە رایگەیاندووە، هێزەکانی سوپا، وەڵامدانەوەی خێرا و چەکدارانی میلیشیاکانیی حەشدی شەعبی بەشداریی ئۆپەراسیۆنەکەیان کرد.



عەبدولئەمیر یاروڵڵا هەروەها رایگەیاند، کە هێزەکانیان سەنتەری حەویجەیان رزگار کردووەتەوە و لە پێشڕەویی بەردەوامن.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و شاری شنگال و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.




باسنیوز