هێزە عێراقییەکان 200 مەتر لە مزگەوتەکەی خەلیفەی رێکخراوی تیرۆریستی داعش دوورن.

بەپێی هەواڵی میدیا عێراقییەکان، لیوا روکن مەعن سەعدی، فەرماندەی دژەتیرۆری عێراق رایگەیاندووە، کە پێشڕەویی هێزەکانیان لە مووسڵ بەردەوامە و بەشێکی کەمی مووسڵ لەژێر دەسەڵاتی داعشدا ماوە.

لیوا روکن مەعن سەعدی هەروەها رایگەیاندووە، کە ئێستا هێزەکانیان تەنیا 200 مەتر لە مزگەوتی نوری دوورن و بە رزگارکردنەوەی ئەو مزگەوتەش، کۆتایی بە دەوڵەتی تیرۆریستی داعش لە عێراق دێت.

دوای داگیرکردنی شاری مووسڵ لەلایەن چەکدارانی داعشەوە، ئەبوبەکر بەغدادی، خەلیفەی داعش وتارێکی لە مزگەوتی نوری پێشکەش کرد و تێیدا دروستکردنی خەلافەتی داعشی راگەیاند.

سەرلەبەیانیی رۆژی یەکشەممە 19.2.2017، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق دەست پێکردنی ئۆپەراسیۆنی رزگارکردنەوەی بەری رۆژئاوای مووسڵی راگەیاند.

رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.

هێزەکانی پێشمەرگەی کوردستان لە چەند رۆژی یەکەمی ئۆپەراسیۆنەکەدا، هەموو ناوچە کوردستانییەکانی سنووری پارێزگای نەینەوایان رزگار کردەوە و رۆژی سێشەممە 24/1/2017یش هێزە عێراقییەکان رزگارکردنەوەی تەواوەتیی بەری رۆژهەڵاتی مووسڵ‌یان راگەیاند.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.