ئەمڕۆ یەكشەممە لیژنەی دەستپاكیی عێراق رایگەیاند لیستی ناوی 780 تۆمەتباریان بە گەندەڵی رەوانەی دادگا كردووە، كە 7 كەسی بە پلە وەزیریان لەنێودایە. لەم ژمارەیەشدا 91 كەسیان تێدایە كە تاوانبار كراون، هەروەها 126 تۆمەتباریشیان لە ماوەی سێ مانگی یەكەمی ئەمساڵدا تۆمەتبار كراون.


لیژنەی دەستپاكی لە راپۆرتێكدا ئاشكرای كرد لە ماوەی چارەگی یەكەمی ئەمساڵدا توانیویەتی ڕێگری لە بەفیڕۆدان و دزینی بڕی زیاتر لە 90 ملیۆن دۆلاری ئەمریكی بكات لەلایەن گەندەڵكارەكانی حكومەتی عێراقەوە.


هەروەها رایگەیاند زیاتر لە 4000 سكاڵا و هەواڵ لێدان و بابەتی سزادانیان دەركردووە. لەگەڵ دەركردنی 500 فەرمانی دەستگیركردن، هەروەها 250 فەرمانی راگرتنی تۆمەتباران، كە وەزیر و پلەی وەزیریان لەنێودایە.


ئەوەشی راگەیاند كە سەركۆمار و سەرۆك وەزیران و وەزیرەكان و پەرلەمانتارەكان بەڕێژەی 100% دارایی خۆیان بۆ لیژنەكە ئاشكرا كردووە، بەڵام جێگرەكانی سەركۆمار كە تەنها بەڕێژەی 33% دارایی خۆیان ئاشكرا كردووە، كە هەریەك لە نووری مالیكی و ئەیاد عەللاوییش دەگرێتەوە و دارایی خۆیان ئاشكرا نەكردووە.
bas news-