سەرۆک وەزیرانی عێراق سەردانی ناوچە رزگارکراوەکانی شاری مووسڵ دەکات.



حەیدەر عەبادی، سەرۆک وەزیرانی عێراق ژمارەیەک وێنەی لە پەیجی تایبەتیی خۆی لە تۆڕی کۆمەڵایەتیی فەیسبووک بڵاو کردووەتەوە و رایگەیاندووە، لەگەڵ فەرماندەکانی ئۆپەراسیۆنی رزگارکردنەوەی مووسڵ کۆ دەبێتەوە.



وەک لە وێنەکاندا دەردەکەوێ، حەیدەر عەبادی جلی سەربازی پۆشیوە و بە فڕۆکەیەکی سەربازیی گەیشتووەتە مووسڵ.



لە پۆستەکەدا بەبێ ئاژەکردن بەو شوێنەی سەردانی کردووە، عەبادی رایگەیاندووە، کە رۆژی چوارشەممە 19.4.2017 سەردانی شاری مووسڵی کردووە.



سەرلەبەیانیی رۆژی یەکشەممە 19.2.2017، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق دەست پێکردنی ئۆپەراسیۆنی رزگارکردنەوەی بەری رۆژئاوای مووسڵی راگەیاند.



رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.



هێزەکانی پێشمەرگەی کوردستان لە چەند رۆژی یەکەمی ئۆپەراسیۆنەکەدا، هەموو ناوچە کوردستانییەکانی سنووری پارێزگای نەینەوایان رزگار کردەوە و رۆژی سێشەممە 24/1/2017یش هێزە عێراقییەکان رزگارکردنەوەی تەواوەتیی بەری رۆژهەڵاتی مووسڵ‌یان راگەیاند.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.








باسنيوز