وه‌زیرى ناوخۆى عێراق، كه‌ به‌م دواییانه‌ ئه‌و پۆسته‌ى وه‌رگرتووه‌، فه‌رمان ده‌كات به‌ به‌ندكردنى برایه‌كی خۆى له‌به‌ر ئه‌وه‌ى نزیكیی له‌ وه‌زیر قۆستووه‌ته‌وه‌ و دامه‌زراندن له‌ وه‌زاره‌تى ناوخۆ و چه‌ند كارێكى دیكه‌ به‌كارى هێناوه‌.



به‌پێی كه‌ناڵى ئاسمانى "غه‌دییر" كه‌ نزیكه‌ له‌ هاوپه‌یمانى نیشتمانى شیعه‌كانه‌وه‌، قاسم ئه‌عره‌جى، برایه‌كی خۆى ده‌خاته‌ زیندان و ڕاشیگه‌یاندووه‌، ده‌بێت له‌ مه‌حسووبییه‌ت و كارى نایاسایی دوور بكه‌ونه‌وه‌.



ئاماژه‌ى به‌وه‌ش دا، كه‌ وه‌زاره‌ته‌كه‌یان سووره‌ له‌سه‌ر جێبه‌جێكردنى سزاكان به‌ پێی یاسا و جێبه‌جێكردنى به‌سه‌ر هه‌ر كه‌سێكدا كه‌ خۆى به‌ نزیك له‌ وه‌زیر ده‌ناسێنێت و ئه‌و نزیكایه‌تییه‌ ده‌قۆزێته‌وه‌ بۆ دامه‌زراندن و كاری نایاسایی.



ڕۆژى دووشه‌مه‌ 30ىكانوونى دووه‌مى 2017، ئه‌نجوومه‌نى نوێنه‌ران متمانه‌ى به‌خشى به‌ قاسم ئه‌عره‌جى، بۆ پۆستى وه‌زیری ناوخۆى عێراق و پێشتر سه‌رۆكى فراكسیۆنى به‌در بوو له‌ په‌رله‌مان.
bas news -