خەلیفەی رێکخراوی توندڕەوی داعش بڕیارێکی بەپەلە بۆ چەکدارانی رێکخراوەکەی لە شاری مووسڵ و شارۆچکەی تەلەعفەر دەردەکات.

بەپێی بڕیارەکەی ئەبوبەکر بەغدادی، خەلیفەی داعش، چەکدارە دەستگیرکراوەکانی داعش لە مووسڵ و تەلەعفەر دەبووردرین و ئازاد دەکرێن.

ئەو بڕیارەی ئەبوبەکر بەغدادی بۆ ئەوەیە سوود لە توانای ئەو چەکدارانە لە بەرەکانی شەڕ وەربگرێت، چونکە لە میانەی ئۆپەراسیۆنی رزگارکردنەوەی مووسڵ لەلایەن هێزەکانی پیشمەرگە و هێزە عێراقییەکانەوە، هەزاران چەکداری داعش کوژراون.

سەرچاوە سەربازییە عێراقییەکان ئاماژە بەوە دەکەن، چەندین بەڵگەنامەی داعشیان دەستکەوتووە، کە تێیاندا چەکدارانی رێکخراوەکە لە مووسڵ داوای هاوکاریی بەپەلەی سەربازیی و خواردەمەنییان لە سەرکردایەتیی داعش کردووە و ئاماژەیان بەوە کردووە، چیتر توانای خۆڕاگرتنیان نەماوە.

لە رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.

هێزەکانی پێشمەرگەی کوردستان لە چەند رۆژی یەکەمی ئۆپەراسیۆنەکەدا، هەموو ناوچە کوردستانییەکانی سنووری پارێزگای نەینەوایان رزگار کردەوە،

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.












باسنيوز