لە ترسی هەڕەشەی میلیشیاکان، حەوت دەزگای میدیایی نووسینگەکانیان لە شاری بەغدا چۆڵ دەکەن و روو دەکەنە هەولێر.



بەپێی راپۆرتێکی ماڵپەری (عەرەبی جەدید) بە ناونیشانی ”وەرزی کۆچ بۆ هەولێر“، عومەر عەبدولڕەحمان، رۆژنامەنووسی عێراقی رایگەیاندووە، کە لە بەغداوە هاتووەتە هەولێر تاوەکو ”پارێزگاریی لە پیشەکەم بکەم و بە ئازادیی و دوور لە ترس کاری میدیایی خۆم بکەم“.



عومەر عەبدولڕەحمان پێیوایە حکوومەتی عێراقی بێ هێزە و ئێستا میلیشیاکان لە بەغدا حوکمڕانی دەکەن.



ماڵپەڕەکە ئاماژەی بەوە کردووە، کە بەهۆی ئەوەی پێچەوانەی شاری بەغدا، ”لە هەولێر یاسا حوکم دەکات و سیستەم هەیە“، لە سێ مانگی رابردوودا حەوت دەزگای میدیایی عێراقی و بیانی نووسینگەکانیان لە بەغدا گواستووەتەوە بۆ هەولێر، جگە لە کۆچی 26 رۆژنامەنووسی بیانی و نۆ رۆژنامەنووسی عێراقی بۆ هەولێر.



بەپێی ئامارەکان، لە ساڵی 2016، 12 رۆژنامەنووس لە عێراق کوژراون و 23ـی دیکەش بریندار بوون، سەرەڕای دەستدرێژیکردنە سەر و رفاندنی 89 رۆژنامەنووسی دیکە.



دوایین دەستدرێژیکردنە سەر رۆژنامەنووسان لە بەغدا بریتی بوو لە رفاندنی خاتوو ئەفراح شەوقیی رۆژنامەنووس لەلایەن 15 چەکداری دەمامکدراو لە باشووری شاری بەغدا.
bas news-