پنتاگۆن ڕادەگەیەنێت، بۆ گفتوگۆكردن لەگەڵ به‌رپرسانی عێراقی سەبارەت بە پرۆسه‌ی سه‌ربازی بە پشتیوانی ئەمەریکا دژ بە چه‌كدارانی داعش لە موسڵ، ئه‌مڕۆ یەکشەممە وەزیری بەرگری ئەمەریکا ئاشتۆن کارتەر گەیشتە بەغدا، بڕیاره‌ دواتر سه‌ردانی هه‌رێمی كوردستان بكات و له‌گه‌ڵ سه‌رۆكی هه‌رێم كۆبێته‌وه‌.

هەشت هەفتەیە هێزەکانی عێراقی بە پشتیوانی هێزی هاوپەیمانان بە سه‌ركردایه‌تی ئەمەریکا شەڕی دژ بە داعشیان لە موسڵ دەستپێکردووە، سوپای عێراقی نزیکەی چارەکێکی شارەکەی رزگار کردووە بەڵام ڕووبەڕووی وه‌ڵامێكی توندی چه‌كدارانی داعش بووه‌ته‌وه‌.

هەفتەی ڕابوردوو ئاشتۆن کارتەر ڕایگەیاند، شەڕی موسڵ شەڕێکی سەختە، دەشێ بەر لە دەستبەکاربوونی دانۆڵد ترامپ سەرۆکی هەڵبژێردراوی ئەمەریکا لە مانگی داهاتوو کۆتایی پێبێت. ئەمەش پێویستی بە خێراکردنی پێشوەچوونەکانی سوپای عێراق هه‌یە.

پنتاگۆن دەڵێت کارتەر چاوی بە سەرۆکوەزیر حەیدەر ئەلعەبادی، سەرۆکی هەرێمی کوردستان مەسعود بارزانی و سەرکردەی هێزی هاوەپیمانان بە ڕێبەرایەتی ئەمەریکا ژەنەڕاڵ ستیڤ تاونسند دەکەوێت
PAYAMNER -