ئەمڕۆ یەكشەممە موقتەدا سەدر ڕابەری مەرجەعی سەدر لە عێراق هەڕەشەی داخستنی نووسینگەی رۆژنامەی (شەرقولئەوسەت)ی عەرەبی كرد لە عێراق، بەهۆی ئەوەی رۆژنامەكە ڕاپۆرتێكی لەبارەی سكپڕكردنی ژنانی عێراق لەلایەن زیارەتكارەكانی ئێرانەوە بڵاوكردبووەوە.

موقتەدا ئەو ڕاپۆرتەی بە"قێزەون" وەسف كردووە و دەڵێ ئەگەر رۆژنامەكە داوای لێبووردن لە هاووڵاتییانی عێراق نەكات، ئەوا نووسینگەی ڕۆژنامەی (شەرقولئەوسەت) بەڕێگەیەكی باو دادەخات. داواشی لە حكومەتی عێراق كرد هەڵوێستێكی جدی لەمبارەوە بنوێنێت.


سەدر گوتیشی ئەو راپۆرتە درۆیە، ڕێكخراوی تەندروستیی جیهانیش ڕەتی كردووەتەوە، ئەم بابەتە سوكایەتیە بە میدیا و رۆژنامەنووسانیش. جگە لەوەی سوكایەتیە بەملیۆنان كەس.


رۆژنامەی (شەرقولئەوسەت) بڵاوی کردووەتەوە، گریگۆری هارتەل، گوتەبێژی رێکخراوی تەندروستیی جیهانی لە بەیاننامەیەکدا رایگەیاندووە، کە رێوڕەسمە ئایینییەکان لە باشووری عێراق ”زۆربەی جار تێکەڵبوونێکی ناڕێک لە نێوان ژن و پیاوان دروست دەکات، بە تایبەت لە نێوان هاووڵاتییانی عێراقی و زیارەتکارانی شیعەمەزهەبی ئێرانی“.

گریگۆری هارتەل پێیوایە بەهۆی زۆریی زیارەتکاران، هێزە ئەمنییەکانی عێراق ئەم ”تێکەڵبوونە ناڕێکە“یان بە زەحمەت پێ کۆنترۆڵ دەکرێت، بۆیە داوا لە وەزارەتی تەندروستیی عێراق دەکات ”هەڵمەتێک بۆ بڵاوکردنەوەی رۆشنبییی تەندروستی و باسکردنی مەترسییەکانی“ ئەنجام بدات.

رێکخراوی تەندروستیی جیهانی ئاماژە بەوە دەکات، کە لە ساڵی 2015، 169 حاڵەتی دووگیانبوونی کچ و ژنانی عێراقی تۆمار کراوە، کە لەلایەن گەنج و پیاوانی ئێرانییەوە ئەنجام دراوە.

ساڵانە بۆ بەشداریکردن لە مەراسیمە ئایینییەکان، ملیۆنان هاووڵاتیی شیعەمەزهەبی جیهان، بە تایبەت هاووڵاتییانی ئێرانی، سەردانی مەزارە پیرۆزەکانی شیعە لە شارەکانی کەربەلا و نەجەف لە باشووری عێراق دەکەن.
BAS NEWS-