هێزه‌ عێراقییه‌كان له‌ چه‌ند گه‌ڕه‌كێكی به‌ره‌ی ده‌سته‌ چه‌پی شاری موسڵ پێشڕه‌وییان كردووه‌ و توانیوویانه‌ بچنه‌ ناو دوو گه‌ڕه‌كی شاری موسڵه‌وه‌ و گه‌ڕه‌كێكی دیكه‌شیان به‌ ته‌واوی له‌ چه‌كدارانی داعش پاككردووه‌ته‌وه‌.

له‌و باره‌یه‌وه‌ فه‌رمانده‌ی ئۆپه‌راسیۆنی موسڵ فه‌ریق روكن"عه‌بدولئه‌میر ره‌شید یاره‌ڵڵا" ئه‌مڕۆ یه‌كشه‌ممه‌ رایگه‌یاند" هێزه‌ عێراقییه‌كان توانیوویانه‌ گه‌ڕه‌كی"كه‌ركوكلی" به‌ ته‌واوی له‌ چه‌كدارانی داعش پاكبكه‌نه‌وه‌ و بچنه‌ ناو هه‌ر دوو گه‌ڕه‌كی"ئه‌لبه‌كر" و "عه‌ده‌ن" له‌ به‌ره‌ی ده‌سته‌ چه‌پی شاری موسڵ.

له‌ لایه‌كی دیكه‌وه‌ فه‌رمانده‌ی فیرقه‌ی دووی ئاڵتوونی"مه‌عن ئه‌لساعدی" ئه‌مڕۆ یه‌كشه‌ممه‌ رایگه‌یاند"سێ هۆكاری سه‌ره‌كی هه‌ن بوونه‌ته‌ هۆی خاوكردنه‌وه‌ی ئۆپه‌راسیۆنی موسڵ و پرۆسه‌ی سه‌ربازی سه‌ر شاره‌كه‌،به‌ پێچه‌وانه‌ی ئه‌و قسانه‌ی له‌ لایه‌ن میدیاكانه‌وه‌ ده‌كرێن و ئاماژه‌ به‌وه‌ ده‌كه‌ن كه‌ ئۆپه‌راسیۆنه‌كه‌ راوه‌ستاوه‌.

له‌ وه‌ڵامی ئه‌و هه‌واڵانه‌ی میدیاكاندا كه‌ رایانگه‌یاندبوو ئۆپه‌راسیۆنی كۆنترۆڵكردنه‌وه‌ی موسڵ به‌ هۆكارێكی نادیار راوه‌ستاوه‌،ئه‌و فه‌رمانده‌یه‌ی فیرقه‌ی دووه‌می ئاڵتوونی گوتی" ئۆپه‌راسیۆنه‌كه‌ رانه‌وه‌ستاوه‌ و هۆكاره‌ سه‌ره‌كییه‌كانی هێواش به‌ رێوه‌چوونی ئۆپه‌راسیۆنه‌كه‌ سێ هۆكاره‌،یه‌كه‌میان ئه‌وه‌یه‌ ده‌مانه‌وێت پارێزگاری له‌ ژێرخانی شاره‌كه‌ بكه‌ین و دووه‌میان به‌هۆی بوونی خه‌ڵكی سڤیله‌ له‌ ناو شاره‌كه‌دا و ده‌مانه‌وێت ژیانیان بپارێزین،سێیه‌م هۆكاریش پاراستنی موڵك و ماڵی گشتییه‌،چونكه‌ داعش خه‌ڵكی سڤیلی شاره‌كه‌ی ناچار كردووه‌ ببنه‌ قه‌ڵغانی مرۆیی بۆ چه‌كداره‌كانی.

ساعدی هه‌روه‌ها گوتی"یه‌كه‌ سه‌ربازییه‌ مه‌یدانییه‌كان پلانی ته‌كتیكیش په‌یڕه‌و ده‌كه‌ن بۆ ئه‌وه‌ی كۆنترۆڵی چه‌كدارانی داعش بكه‌ن به‌ تایبه‌تی ئه‌و چه‌كدارانه‌یان كه‌ خۆیان شاردووه‌ته‌وه‌ و له‌ ناكاو له‌ مه‌ودایه‌كی نزیكدا رووبه‌رووی هێزه‌ هێراقییه‌كان ده‌بنه‌وه‌ و ئۆتۆمبێلی بۆمبڕێژكراو ئاراسته‌ی پێشڕه‌ویی هێزه‌كان ده‌كه‌ن،هه‌ر بۆیه‌ زۆر جار بۆ رێگه‌گرتن له‌و پلانانه‌ی داعش رێگاكان ده‌بڕین و ناوچه‌ رزگاركراوه‌كان داده‌بڕین بۆ ئه‌وه‌ی بیانپارێزین.
K24-