ژمارەیەک چەکداری رێکخراوی توندڕەوی داعش هاوسەری خەلیفەی رێکخراوەکەیان بە بارمتە دەگرن.

بەپێی زانیارییەکان، بەهۆی نەمانی ورە و شکستیان لەبەرامبەر هێزەکانی پێشمەرگە، چەکدارانی داعش لە شاری مووسڵ رووبەڕووی یەکتر بوونەتەوە و شەڕی چەکداریی رووی داوە، هاوکات ژمارەیەک چەکدار وازهێنانی خۆیان لە رێکخراوەکە راگەیاندووە.

سەرچاوەکانی زانیاری لە شاری مووسڵەوە ئاماژە بەوە دەکەن، کە ئەبوبەکر بەغدادی، خەلیفەی داعش لە ترسی گرتن و کوشتن، لە شاری مووسڵ نەماوە و رووی کردووەتە سووریا و ئەو چەکدارانەی لە داعشیش جیابوونەتەوە، هاوسەری بەغدادییان بە بارمتە گرتووە.

ئەو چەکدارانە لەبەرامبەر ئازادکردنی ئەو ژنە، داوای پارەیان لە خزم و کەسی ئەبوبەکر بەغدادی کردووە، تاوەکو بە پارەکە خۆیان لە مووسڵ رزگار بکەن و واز لە داعش بهێنن.
بەرەبەیانی رۆژی دووشەممە 17ـی تشرینی یەکەمی 2016، فەرماندەیی گشتیی هێزەکانی پێشمەرگەی کوردستان دەستپێکردنی ئۆپەراسیۆنێکی بەرفراوانی بۆ رزگارکردنەوەی مووسڵ لە سنووری میحوەری خازر راگەیاند و ناوچەیەکی فراوانی رۆژهەڵاتی پارێزگای نینەوا لەلایەن هێزەکانی پێشمەرگەوە رزگار کرایەوە.

لە مانگی حوزەیرانی 2014 و لە سەردەمی سەرۆک وەزیرانێتیی نوری مالیکی، دوای هەرەس هێنان و شکستی سوپای عێراق، شاری مووسڵ و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار و چەند ناوچەیەکی باشووری کەرکووک لەلایەن چەکدارانی داعش داگیر کرا.













باسنيوز