ژنە پەرلەمانتارێکی عێراقی رایدەگەیەنێت، کە ئەمریکا کار بۆ سڕینەوەی عێراق لەسەر نەخشە دەکات.

رۆژی یەکشەممە 11ـی ئەیلوولی 2016، فیردەوس عەوادی، ژنە پەرلەمانتاری هاوپەیمانیی نیشتیمانیی شیعەکان لە بەیاننامەیەکدا رایگەیاندووە، کە هەردوو پارتی کۆماری و دیموکراتەکانی ئەمریکا هەوڵ دەدەن پرۆژەی جۆ بایدن، جێگری سەرۆکی ئەمریکا بۆ دابەشکردنی عێراق، جێبەجێ بکەن.

فیردەوس عەوادی پێیوایە قۆناغی یەکەمی دابەشکردنەکە بە گوتەی دیموکرات و کۆمارییەکان لە کۆنگرێسی ئەمریکا دەستی پێکردووە، کە داوای دامەزراندنی پارێزگای دەشتی نەینەوایان بۆ ”پارێزگاری لە کەمینە ئایینی و نەتەوەییەکان“ کردووە.

ئەو ژنە پەرلەمانتارە باسی هۆشداریی داوەتە سەرکردەکانی عێراق، بەوەی ئەمریکییەکان بەم هەنگاوەیان رێگا بۆ دروستبوونی چەندین کانتۆنی نەتەوەیی و تائیفی لە عێراق خۆش دەکەن، کە مافی دیاریکردنی چارەنووسیشیان پێدەدات و دواجار دەبنە هۆی ”دابەشبوون و سڕانەوەی نەخشەی عێراق لەسەر نەخشەی گۆی زەوی“.

دوای دروستبوون و تەشەنە سەندنی ناکۆکییە تائیفییەکان لە عێراق، جۆ بایدن پێشنیاز دابەشکردنی عێراقی بۆ سەر سێ دەوڵەتی فیدڕالیی کورد، سوننە و شیعە کرد، بەڵام جگە لە کورد، هەردوو پێکهاتەکەی دیکە رەتیان کردەوە.

دوای هێرشی رێکخراوی توندڕەوی داعش، کە لە مانگی حوزەیرانی 2014 هەرەسی بە سوپای عێراقی هێنا و پارێزگا سوننەنشینەکانی نەینەوا، دیالە، سەڵاحەدین و ئەنباری داگیر کرد، هاووڵاتی و لایەنە سوننەکانی عێراق لە هەڵوێستەکەیان پەشیمان بوونەتەوە و داوای دروست کردنی هەرێم بۆ ناوچە سوننییەکان دەکەن.





باسنيوز