فەرماندەیی پرۆسە سەربازیەکانی جزیرە دەستپێکردنی ئۆپەراسیۆنێکی تری دژی چەکدارانی داعش لە ناوچەی "دولابی" قەزای هیت سه‌ر به‌ پارێزگای‌ ئه‌نبار دەستپێکرد.

لیوا روکن قاسم المحمدی فەرماندەی پرۆسە سەربازیەکانی جەزیرە لە بەیاننامەیەکدا ڕایگەیاند، سەرلەبەیانی ئەمڕۆ هێزەکانی سوپای عیراق بە مەبەستی پاک کردنەوەی تەواوی پارێزگای ئەنبار لە چەکدارانی داعش، لە سێ میحوەرەوە هێرشیان بۆ سەر مۆڵگەکانی داعش دەستپێکرد.

ئامانج لە هێرشەکەی سوپای عیراق پاککردنەوەی ناوچەی "دولاب"ە لە خۆرئاوای شاری هیت کە ٧٠ کیلۆمەتر لە ڕومادی سەنتەری پارێزگای ئەنبارەوە دورە، بە پێی بەیاننامەکە..

لیوا روکن قاسم المحمدی وتی‌ "گرنگی ناوچەی دولاب بۆ ئێمه‌ ئەوەیە ئەو شوێنە دواین مۆڵگەی چەکدارانی داعش دەبێت لە خۆرهەڵاتی هیت".

هەر بە پێی بەیاننامەکە له پرۆسەکەدا، هێزەکانی عەشایه‌ر و فڕۆکە جەنگیەکانی هێزی ئاسمانی بەشداری دەکەن.

پێشتریش حکومەتی عیراق چەندین ئۆپەراسیونی دژی چەکدارانی داعش لە ناوچە جیاجیاکانی عیراق ڕاگەیاند، کە دواینیان ئۆپەراسیونی ڕزگار کردنی فەلوجه بوو کە دوای ٤٠ رۆژ لە دەستپێکردنی بە سەرکەوتویی کۆتایی هات و داعش لە شاری فەلوجە کرایە دەرەوە.








خەندان