وەزیری دەرەوەی عێراق رایدەگەیەنێت، کە هەوڵدان بۆ کودەتای سەربازیی سوپای تورکیا کێشەیەکی ناوخۆیی ئەو وڵاتەیە و عەبادیش داوای کۆبوونەوەیەکی بە پەلە دەکات.



حەیدەر عەبادی، سەرۆک وەزیرانی عێراق لە راگەیەندراوێکدا لەبارەی هەوڵی کودەتای سەربازی لە تورکیا، رایگەیاندووە، کە بە وردی لە بارودۆخ و دوایین پێشهاتەکانی تورکیا دەڕوانێت و داوای کۆبوونەوەیەکی بە پەلەی ئەنجومەنی وەزاریی ئاسایشی نیشتیمانیی عێراق دەکات.



ئیبراهیم جەعفەری، وەزیری دەرەوەی عێراق داوای لە سوپا و حکوومەتی تورکیا کردووە ”رێز لە بنەما دیموکراتییەکان بگرن و خوێن نەڕێژن“.



ئیبراهیم جەعفەری پێیوایە ئەو هەوڵە بۆ کودەتا کیشەیەکی ناوخۆیی تورکیایە و وەزارەتی دەرەوەی عێراق بە گرنگییەوە چاودێری دۆخەکە دەکات.



شەوی هەینی 15ـی تەمموزی 2016، بەشێک لە سەرکردەکانی سوپای تورکیا هەوڵیان دا کودەتایەکی سەربازیی بکەن و کۆتایی بە دەسەڵاتی رەجەب تەییب ئەردۆغان، سەرۆک کۆماری تورکیا و پارتی داد و گەشەپێدانی تورکیا (ئاکەپە) بهێنن، بەڵام کودەتایەکە شکستی هێنا.








باسنیوز