ئەندامێکی ئەنجومەنی پارێزگای نەینەوا ئاماژە بەوە دەکات، فڕۆکەخانەی گەیارە دەکرێتە ناوەندی بنکەی ئۆپەراسیۆنەکانی ئازادکردنەوەی شاری مووسڵ و ژمارەیەک ڕاوێژکاری سەربازیی ئەمەریکاش لەوێ جێگیر دەکرێت.

ئەمڕۆ دووشەممە 11\7\2016، غەزوان داودی، ئەندامی ئەنجومەنی پارێزگای نەینەوا، ڕایگەیاند: “دوای ئازادکردنەوەی فڕۆکەخانەی گەیارە، بڕیارە بکرێتە ناوەندی سەربازی و لەوێوە پرۆسەی ئازادکردنەوەی مووسڵ دەست پێبکات”. ئەوەشی ئاشکرا کرد کە ژمارەیەک ڕاوێژکاری سەربازیی ئەمریکا لەگەڵ سوپای عێراق لەو بنکە ئاسمانییە جێگیر دەکرێن. دەشڵێت: “ئەو ناوەندە بۆ ئازادکردنەوەی تەواوی مووسڵ گرنگە".

ڕۆژی یەکشەممە 10\7\2016، هێزە عێراقییەکان هێرشێکی فراوانیان کردە سەر بنکەی گەیارەی ئاسمانی لە ڕۆژئاوای شارۆچکەی مەخموور و توانییان بنکەکە کۆنتڕۆڵ بکەنەوە کە 45 کلیۆمەتر لە ناو شاری مووسڵەوە دوورە.








باسنیوز