ئەنجومەنی هۆزە عەرەبەکانی خورماتوو دژ بە حەشدی شەعبی دەوەستنەوە
لەو كۆنگرە رۆژنامەوانییەدا سائیر بەیاتی، یەكێك لە سەرۆك هۆزەكانی عەرەبی خورماتوو بەیاننامە ناڕەزاییەكەی خوێندەوە و ئاماژەی بۆ ئەوە كرد كە، چەكدارەکانی حەشدی شەعبی دەستیان لە كوشتن و بڕینی خەڵكی خورماتوو و دەوروبەری هەیە بە هەموو پێكهاتەكانەوە و لە دوایەمین كردەوەشیاندا ژمارەیەك زیندانی عەرەبی سوننەیان لە شارەدێی ئامرلی سەر بە قەزای خورماتوو كوشت و بەبێ ئەوەی هیچ تاوانێكیان كردبێت.
شێخ سائیر، ئاماژەی بۆ ئەوەش كرد كە، ئەو كردەوە چەپەڵانەی چەكدارانی حەشدی شەعبی شەرمەزار دەكەن كە دژ بە خەڵكی خورماتوو ئەنجامی دەدەن و ئەو چەكدارانە بۆ ئەجەندای دەرەوە كار دەكەن و چەندین جار بانگەوازیان بۆ حكوومەتی عێراق كردووە، بۆ ئەوەی ڕێگا لە خراپە كارییەكانی حەشدی شەعبی بگرێت، بەڵام سوودی نەبووە و قەزاكە ژمارەیەكی زۆری مافیا و خەڵك كوژی تێدایە و هەر ئەو مافیانەن ناهێڵن ئاوارە عەرەبەكان بگەڕێنەوە بۆ شارەدێی سلێمان بەگی سەر بە خورماتوو .
لە كۆتایی بەیاننامەكەشدا شێخ سائیر تیشكی خستە كر ئەوەی كە، پێویستە چارەسەری دۆخی خورماتوو بكرێت و رێگە لە مافیاكان بگیرێت كە بە ئارەزووی خۆیان خەڵك دەكوژن و دەڕفێنن و زیندانییەكانیشیان ئازاد بكرێت كە لەلایەن حەشدی شەعبییەوە بەبێ هۆ زیندانی كراون و ژیانی ئاسایی بۆ خورماتوو بگەڕێتەوە و بۆ ئەوەی وەك ڕابردوو برا ئاسا لەو ناوچەیە ژیان بەرینە سەر.
باسنيوز
